Kawl Ralkap nih Paletwa khuate ah khuami Caw 60 leng an kah: CHRO

Salai Tluangkipthang — Chin ramkulh, Paletwa peng ah um hmun a khuarmi Kawl Ralkap Light Infantry Division (LID) 11 tang ah a ummi nih an umnak khuate chung ah a tlonglengmi satil an kah i, thla khat chung ah caw 60 leng le a dangdang vok, ar tbk. zong tampi an kah tiah Chin Human Rights Organization (CHRO) nih July 15 ah cathanh a chuah.

“Kawl Ralkap nih an meithal in, Caw 60 leng le a dangdang innzuat satil ‘maheh, vok le ar tbk.’ a tampi an thah cang i an mehhang ah an i serh” tiah CHRO cathanh nih a langhter.

Khua mi pakhat nih, “Nifatin nawn in an thah i, thla khat chung ah hi vialte hi an thahmi a si. A bik in an khua zaamtak in khua an saknak hmun Seint Sin Wa, An Kho Wa, See Hpa Laung tbk. khua hna ahhin an thahnak a si. A caan ah cun, caw khat lawng an meithal in an kah. A caan ahcun, caw hnihthum an kah i, a sa thatnak lawng an lak i, a dang cu an kal tak. A chel ahcun, khuami va i lak u an ti hna” tiah a min langhter lo in CHRO ah a chim.

Paletwa peng chung ummi khuate tampi cu kahdohnak ruang ah an chuah tak, an zam tak caah an innzuat satil pawl cu vaivuan in an um. An satil an zoh khok tilo. Atu ah, An Kho Wa khuami hna zong Tein Let Wa khua ah an zaam i, nihin tiang ah khua ah an kir kho lo. Cu ve bantuk in, See Hpa Laung khuami zong nih an ton ve. Khua an kir kho ve lo tiah theih a si.

Atu bantuk in Kawl Ralkap nih an duh poah in innzuat satil an kahnak le an thahnak hi Paletwa khua pawng hrawng ah a si i, Ralkap Light Infantry Battalion (LIB) 289 an umnak pawng hrawng ah a si. A bik in, Kaladan tiva le Seint Sin Wa khua panwg hrawng ah a si.

Kahdohnak ruang ah Khuate ah a ummi khuami hna cu Kawl Ralkap nih duhpoah in an luhchuah ter hna lo pin leng ah, herhhai zalh ah, zarh khat nihnih te lawng khualeng chuahnak nawl le Paletwa ah herhhai zalh caan an pek hna. Cun, nihin tiang Paletwa khua chung cu duhpoah luh khawh a si lo ruang ah eidin awk an har ko tiah theih a si.#