Kawlram Chuanvawr Aung La N Sang (Burmese Python)
Salai Uk Nun Bawi| Chin Digest Vol.3, No.3 (2017 June)| MMA-Middle Weight ah One Championship vawlei pumpi ah a thiam bik zuamnak i buanco si mi Russia ram mi Vitaly Bigdash cu Burmese Python tiah theih mi Aung La N Sang nih June 30, Yangon i an i celhnak ah a tei i a buanco taisawm cu a chuh.
Tutan ah Aung La N Sang nih buanco taisawm a chuh mi Vitaly Bigdash nih hin Aung La N Sang hi Jakarta, Indonesia an rak i thongh lio ah buan in a rak khirh cang mi a si. Nain cu lio ah cun rikhiah mi caan phanh hlan ah kan rak i thongh lawng si lo in duhning in timhtuahnak caan ka ngeih lo caah a si tiah Aung La N Sang nih a chim. Cu ka rak sunghnak chung in zeidah ka hmuh ti cun a kut thazang a der i a mi thongh daan a fak lo. Cun contract ah khan ka sungh ahcun Kawl ram ah thongh thannak kan tuah than lai ti aa rak i tel. Cucaah tutan ka tei khawh nakding ca ah hin a thadernak zawn a si mi a kut hmannaklei he aa pehtlai mi boxing lei deuh papek in kaa timhtuah caah atutan ah ka teinak hi a si tiah Burmese Python nih cun a chim.
Aung La N Sang cu vawleipi nih Burmese Python tiah theih mi Kawl ram nih kan i ngeih chun ram zakip hmai ah kan chuanvawr boxing thongh thiam a si. Aung La N Sang hi America ah siang cacawng ding in a kal hnu lawng aa thong mi a si. America i Indiana ramkulh ah a rak i thongh lio ah bual uktu nih khawika ram in dah na rat tiah a hal i Burma in tiah a rak leh. Cu i a rak zohtu ramdang mi hna nih an theih mi cu ‘Burmese Python’ ti mi zuar mi rul lawng hi a rak si.
Cu tikah ‘Burmese Python’ na hngal maw an ti i hngal ko a ti caah ‘Burmese Python’ ratnak ram in a ra mi a si tiah Aung La N Sang cu ‘Burmese Python’ tiah an auh i cuticun kawh auh beh a si.
Hi dirhmun ka phak khawhnak hi chunchun zanzan in mihrut bantuk in ka rak i zuam ca ah le hi dirhmun phak hi ka chunmang lian bik a si caah atu bantuk in vawlei cung champion ka si khawhnak hi a si tiah teinak a hmuh mi kong he pehtlai in a chim. Middle weight i One Champianship buanconak taisawm a lak hlanah voi tampi a rak i celh hmasa. A hramthawk ah show a fa tete Local Show in a rak i celh. Cun National Show, Cu dih in International show tiang a kai hi a si.
Kai thawkkaa ah cun tangka zong ka ngah lo leng ah ka nu le pa zong nih thazaang an ka pe lo. Cu ruang ah fak khun in kaa zuam. Dot khat hnu dotkhat teinak ka hmuh hnu, kum riat (8) renglo kaa celh hnu lawng ah International Level ka phanh khawh hi a si tiah Aung La nih cun a chim.
A ngakchiat lio i aa hruhpi mi boxing thongh le chungkhar nih an rak fial mi cacawn a rak i kalh. Harnak tampi a tong. Nain, a donghnak ah a pahrang cu aa hruhpi mi thil cungtu ah a lang. Hi kong he pehtlai in a pa nih a chim mi cu nu le pa nih kan fale hi kan duh mi kaiter nakin an i hruhpi mi thil rak cawnter hi papek deuh ding a si, tiah a chim.
America ah a rak kalnak a ruang cu fimnak cawn, cu hnu ah kawl ram ah ka hman than lai ti hi a saduhthah a rak si. US ah kal in a cawn mi cu Agricultule Science a si. MMA hi hmetlio tein a huam tuk mi celhnak phun a si tikah fimnak cawn pah in aa celh. Kum 19 a rak si lio tein a rak i celh cang. Bachelor Degree a hngah hnu zong ah MMA cu pehtlai in aa celh peng. 2005 kum khan a rak i celh i atu ah cun aa celhnak kum 12 a si cang.
MMA (Mix Martial Art) ti mi cu thongh, chuih, paih, ireh, iceh…tbk a phuntling tuah khawh a si. Mah duhning poh in i celh khawh a si tikah ka uar khun. A hramthawk ah cun hohmanh nih an ka thei lo nain atu ah cun zapi nih an ka theih cang. A tu teinak ka hmuh nakding ca ah nikhat suimilam paruk tluk ka cawng. A caan ah cun zarhkhat ah i dinh lo in ni sarih ning tein ka cawn caan zong a um tiah aa zuamnak kong he pehtlai in a chim. Mino sin ah biacah ka duh mi cu mah le tinh mi cio i seh chih buin fakpi in i zuam cio hna seh ti ka duh ti hi a si.
A tu teinak a hmuh hnu zong ah pehtlai tein i celh ding in timhtuahnak a ngei. Hi taisawm hi a hohmanh nih chuh than khawh ti lo dingin kaa celh lai a ti. Ka ngandam i ka thazaang um chung poh cu i celh than peng ka duh ko. MMA (Mix Martial Art) cu thongh, chuih, paih, ireh, iceh…tbk a phuntling tuah khawh a si caah cawn ding le thiam than ding a tamtuk rih tiah a chim.
Aung La N Sang cu Kawl mi zapi nih tanh mi le i chawr mi a si bantuk in Aung La N Sang aa thong cang lai ti a si cun TV chung in zohtu siseh, a hmun in zohtu siseh mi tampi nih tha pek a si bantuk in nai tan aa thonghnak ah TV in a zohtu pakhat cu a thintur tuk caah a zohnak hmun in a tlu i a thi mi zong a um. Cu a thi mi pa ruak va humh ah Aung La cu a kal i bulh zong a va pek hna.
Burmese Python Aung La N Sang cu khrihfa tha ngaingai a si bantuk in a miphun Kachin miphun ca zong ah hnakkar tenh in amah ti khawh tawk in aa zuam mi a si. Aa thongh i teinak a hmuh fatin a chim mi cu Pathian thawng in a si__ Pathian lo in le tha petu nanmah lo in cun cun hihi a si kho lo ti hi a si. Atu ah cun amah thawng in Kawl ram nih vawlei cung boxing buantual ah mithmai kan hun ngei cang.
Aung La N Sang cu May 2, 1965 kum ah Myitkyina, Duu-Kah-Htawng sang ah a rak chuak. Unau chuahpi Panga an si i an chuahkehnak khua ah kumriat an um hnu ah Yangon ah an i thial. Atu cu America ram i Maryland ah khua ah chungkhar he khua a sa mi a si.
Ch: VOA Burmese News, Kamayut Media
About The Author
