Kawlram President U Win Myint Nih U Soe Thet Cu Chin Ramkulh Minister Caah Rian A Pek Cang

The Chinland Post- Hakha| Chin ramkulh Minister sinak in aa dinmi Electric le Sipin Minister Salai Isaac Khen aiawh ah Kawlram President U Win Myint nih phungningte in May 25 ah Paletwa peng mi U Soe Htet cu Chin ramkulh Minister rian a pek cang tiah thawng kan theih.

Chin ramkulh Chief Minister nih U Soe Htet cu Chin ramkulh hluttaw tonpumnak ah Minister rian pek ding in a chuahpi in Hluttaw nih a fehter hnu ah atu bantuk in President nih rian a pek hi a si.

Chin ramkulh hluttaw ah U Soe Htet Minister pekding ceihmainak an ngeih lioah NLD MPs in cheukhat nih an al tiah kan theih. Kanpetlet, Paletwa, Falam le Tonzang in MP hna nih U Soe Htet Minister pek an duh lonak le, NLD MP chung in pek ding an duh caah atu bantuk in alnak hi a si tiah kan theih.

Paletwa peng mi U Soe Htet cu ralkap rengh in Duh Bohmugyi tiang a phanmi a si i Chin ramkulh Minister rian pek a si hlan ah ramkomh Amyotha Hluttaw ah Deputy Director a tuanmi a si.

U Soe Htet cu Paletwa min in Me Luh tiah a min theihmi a si hi 1983 in ralkap a luh hlan ah Chin sianghleirun cawlcanghnak zong ah a rak i telmi a si. Cun atu lio hi Naypyidaw i Chin Miphun Ni tuahnak Committee ah haotu a tuan lio a si.

U Soe Htet cu May 28 in Hakha Chin ramkulh cozah zung ah phungning in Minister rian in zung a kai cang lai.

Photo Credit: Chin World

Na ruahning rak langhter ve.. (Leave a comment)

%d bloggers like this: