Kawlram Ramkhel Biaruah Remdaihnak Cu Zero Lawng A Si Ko Rih; Dr. Sui Khar

0

City Hunter| 2018 February 28| Nihin Kawlram ramkhel biaruah remdaihnak lamthluan cu hmai a nor khawh taktak rih lo caah a dirhmun hi zero (pakpalawng) lawng a si ko rih tiah Chin ramkhel upa pakhat sin in kan theih.

Hi kong he pehtlai in tu lio Kawlram remdaihnak lamthluan cozah he i chawnhbiaknak phu JMC ah Secretary zong a si i Chin National Front (CNF) zong ah Assistant General Secretary a rian a tuan liomi Dr. Sui Khar nih atu bantuk in a chim.

“Atu lio Kawlram remdaihnak lamthluan cu a hnoksak tuk rih. Ramkulh dirhmun hmanh in kahngolnak aa tuah kho dih rih lo. A sang bik in rampi kahngolnak (NCA) hnatlak minsen thutnak vial ceo lawng khi a si rih. Kumzabu panglong conference e, cu e, kha e tiah kan tuah nain hmai a nor kho lo. Ramkhel biaruahnak dirhmun taktak kan phan kho lo. Ramkhel biaruahnak kan ngeih hlan chung paoh cu Kawlram ah remdaihnak muisam taktak a leng kho ding a si lo. Cucaah, nihin tiang Kawlram ramkhel remdaih biaruahnak kan ngeih khawh rih lo caah a dirhmun cu pakpalawng (zero) a si ko rih” tiah February 23-25 tiang Kalay- Hotel BGH ah tuahmi Chin Youth Organization Conference ah a chim.

“Tlangcung miphun nih kan duhmi federal ramkomh pi sernak, ramkhel biaruahnak taktak hi cu kan thawn bik ah a taang rihmi NLD cozah kut ahhin hram lawng aa bunh kho lai. Hmai a nor kho rih lai lo. Tlangcung hriamtlai phu le cozah ralkap lei kan i zumh lonak a fak tuk. Anmah cozah hrimhrim zong hi ralkap lei phukhat, ramkomh cozah lei phukhat le hluttaw tiah phu then ah an i then. Cu bantuk lung i khahlonak le i zumhlonak, i lunghrinhnak vialte nih nihin Kawlram ramkomhpi remdaihnak lamthluan fakpi in a hnorsuan. Hihi a kan donkhantu bik a si. Ralkap lei hrimhrim hi an biachimmi le an tuahsernak aa zulh lengmang lo caah tlangcung hriamtlai phu nih an zumh bak lo nak hna hi a si” tiah a chimchih.

President U Thein Sein cozah chan ah ram pumpi huap kahngolnak (Nationwide Cease-fire Agreement _NCA) hnatlak minsen thutnak an ngei kho. Tlangcung hriamtlai phu 8 nih an rak thut. NLD cozah, President U Htin Kyaw chan nizan naite ah tlangcung hriamtlai phu 2 nih NCA min an thut than caah an zapi phu 10 an si cang. NCA min a thu phu 10 lakah CNF/CNA tiah theih a si.

Kumzabu 21 panglong conference zong thlaruk dan ah voikhat lengmang tuahding tiah bia an khiah. Asinain atu tiang voi hnih lawng an tuah khawh rih. Avoi 3nak tuah ding hi voithum hrawng a ni an leet lengmang ruang ah an tuah kho rih lo. March thla chung ah aa tuah kho te hnga maw tiah ramkhel lei cawlcanghtu hna nih an ngiat cuahmah liopi a si.

About The Author

Na ruahning rak langhter ve.. (Leave a comment)

%d bloggers like this: