Kawlram Tilianh Harnak In Minung 25 An Thi I Singkhat Renglo Harnak An Tong Cang

City Hunter| 2018 July 31| Atu lio Kawlram ruahpi fakpi in a sur, tilianh ruang le mincimh ruang ah July 30 tiang ah minung 25 an thi i minung pathum an tlau. Tiral in harnak a tongmi zapi hi singkhat (100,000) renglo an si cang tiah Myanmar ramkomh nunchanhnak le hmunhma pekthannak ministry zung nih an thanh.

July 30 zingkah Taningthari ramthen, Kawhtaung khua in minung 5 an thi. A thimi hi pa pahnih le nu pathum an si. Anmah lak in minung pali hi innchungkhar pakhat an si.

July 28, Pago khua ah cozah riantuantu pahnih an thi. Cu pin ah July 27 ah minung pakhat a thi fawn. Cun, kan hnu zarh ahkhan pa upa pakhat le ngakchia pakhat ti ah an paam i an thi. Cucaah, Pago ramthen in minung 5 an thi cang.

July 26 le July 27, Shwe-gyin khua ah minung pahnih an thi. Taningthari ramthen, tiral ruang ah minung 6500 tluk harnak a tongmi an i dornak ah pa pakhat ti ah a tla i a thi.

Bilin le Yangon-Mawlamaing motor lampi ah ralkap pathum July 27 ah ti an tla. July 30 ah ruak pakhat an hmuh i pahnih cu atu tiang an hmu rih hna lo.

Magwe ramthen, July 24 ah ruah fakpi in a sur i tiva a tanmi nu pahnih ti nih a fenh hna i an thi.

Naypyidaw- Nattaungchaung ah lo in a rak tlungmi kum 70 pa cu July 23 ah tiva nih a fenh i a thi.

Kayin ramkulh, Ba-an khua July 22 ahkhan thingram zung cozah riantuantu pakhat nih ti nih a fenh i a thi. Cun July 29 ah Ba-an khuami pa pakhat ti nih a fenh i a thi fawn.

Kachin ramkulh, Moekauh peng July 28 zan ah ruah fakpi in a sur i Nanciayichaung ah pa pahnih ti nih a fenh hna i an thi.

Shan ramkulh Lasho khua July 28 ah motor pakhat ti nih a phum, a fenh i motor chung ah a ummi pa pakhat a tlau. July 30 tiang an hmu rih lo.

Shan ramkulh Maingsat peng July 27 zingka ah ruah fakpi in a sur lio ah vawlei a cim i pa pathum an thi.
Yakhine ramkulh Kyautphyo peng, July 30 ah nu pakhat ti ah a tla i a thi.

A cunglei a thimi cazin langhtermi ah Kachin ramkulh Hpakant ah July thla chung ah voi hnih vawlei vawr a cimh ruang ah a thimi cazin telh chih an si lo. Hpakant ah July 14 le 24 ah vawlei vawr voihnih a cimh ruang ah a tlawm bik minung 50 tluk an thi i 60 renglo hliamhma an tuar.
Ref: 7Day, RFA Burmese

Na ruahning rak langhter ve.. (Leave a comment)

%d bloggers like this: