Kawlram US Embassy Tawlrelnak In US Rammi Minung 267 Nihin An Zuang

|The Chinland Post – April 6, 2020| Covid-19 zawtnak ruang ah vawleicung ram tampi nih khualtlawnnak an thulh ruang ah Kawlram ah aa tapmi US rammi sinak a ngeihmi minung 267 cu Kawlram um US Embassy tawlrelnak in April 6 ah US ram lei an zuanter hna tiah thawng kan theih.

Hi bantuk in Kawlram ah aa tapmi US miphun hna an kir khawhnak ding ah Kawlram cozah in Ministry of Health and Sports nih a kan tawlrelpi tiah US Embassy nih thawngthanhnak ah an ttial.

“Kan ton bal lomi harnak ruang ah Kawlram ah aa tapmi US miphun le US ram ah khua a sami minung 267 cu nihin (April 6) ah Embassy tawlrelnak in US lei kan kalter khawh hna. An khualam tlamtling hram sehlaw damte in an umnak cio an phak khawhnak caah thla kan campiak hna. Hi thil a tlamtlinnak caah a kan bawm tu Kawlram Ministry of Health and Sports cung ah lunglawmhnak tampi kan ngei,” tiah US Embassy nih thawng an thanhmi ah an langhter.

“US Embassy le US cozah tawlrelnak in nihin US lei aa thawhmi kan tam ngai. San Francisco (California State) khuapi ah vanlawng nih a kan thumh lai i, mah hnu cu mah le umnak cio cu pumpak in i tawlrel cio a si lai. Nihin aa thawhmi ah US rammi sinak a ngahmi Chin le Karen kan tam ngai,” tiah nihin vanlawng in a kal vemi US rammi sinak a ngeimi Chinmi pakhat nih a chim.

US cozah nih caansau nguh in Kawlram ngandamnak lei thanchonak caah US Dollar 176 nuai hman aa timh. Tutan Covid-19 dohnak caah Kawlram nuai 3.8 USD a bawmh. Hihi US cozah nih Kawlram hmailei ngandamnak caah a chiahmi USD nuai 176 chung in a si tiah US Embassy nin thawng an thanhmi ah an langhter.

Nihin tiang ah US ram cu Covid-19 zawtnak in a zawmi an tam bik nak ram a si. April 6 Kawlram caaan sml 9:00 pm tiang ah a zawmi dihlak 337,971 an phan i a thimi 9649 an phan cang tiah VOA nih a langhter.

Vawleicung huap in zawtnak hmuhmi nuai 1.3 (sing hleithum) leng an phan in a dihmi dihlak 70,000 renglo an si cang.

Na ruahning rak langhter ve.. (Leave a comment)

%d bloggers like this: