President U Win Myint nih Kayah CM phuahnak ca a chuah: Mirangca thawngzamhmi ah cozah nih an palh

Kayah ramkulh Chief Minister U L Phaung Sho/Personal Facebook profile

Salai Bawi Lian Sang |TCP-Kalay| September 4, 2020 — National League for Democracy (NLD) cozah nih Kayah Chief Minister (CM) U L Phaung Sho cu a rian tlaihmi in Ramkulh (Pyine) Hluttaw nih phuah ding in bia an chah i Rampi President sinah ca an kuat hnu ah 2020 September 3 ah President U Win Myint nih a rian in phuahnak ca a hun thangh.
Tutan cozah nih cathanh a tuahmi ah fak ngai in a palhmi Social Media cung ah an hun phozar ngaingai.

Cozah nih mirangca in cathanh an chuahnak ah, Kayah State Chief Minister tiah tial lo in, Chin State Chief Minister tial an tial sualmi cu Facebook cung ah a karh ngaingai i Online hmangmi hna nih an hun soisel cio. 

Ramkomh cozah nih mirangca in nawlchuahnak cathanh an chuahmi Kayah State tiah tial lo in Chin State tiah an i palhmi cu a tanglei ah hmanthlak in kan hun thil chih:

NLD cozah kum (5) chungah Chief Minister pali (4) rian an dinhter cang hna. Tanintharyi (CM) Dr. Leh Leh Maw, Mon (CM) U Min Min Oo le Kayah (CM) U L Phaung Sho cu eihmurnak in phuah an si. Nain, Ayeyawadi (CM) Man Kyaw Ni cu a ngandam lo ruangah aa dinh mi a si.

Kayah ram Chief Minister U L Phaung Sho cu September 1 ah Pyine Hluttaw meeting ah zumh awktlaklo tiah 2008 phunghram Upadi 263 (A) in sualnak a ngei tiah bia an ceih i Hluttaw MP dihlak 20 chung in MP 16 nih a sual ko an ti. Nain, MP palai minung 4 lawng nih a mah an dirkamh hi a si.

USDP cozah chan lio Theng Motor (JCB Seh) 18 cu ramthen cozah nih mi a hlanh hna hlei ah Kayah Day an tuahnak vawlei hmun cu Ramkulh Hluttaw nih hnatlaknak a rak ngei nain CM nih vawlei hmun a hlanhnak sachok tuah in amah pumpak pawcawnnak caaah a tuah tiah hlathlai bu nih an ti.

Kayah Chief Minister an zumh lomi kong ah cozah hlathlatbu cu August 14 ah an ser. An hruaitu Chairman ah U Te Ye, Chungtuan (Secretary) U Khin Maung Tun@ Naw Ei Kah le chungtel 3 an dihlak minung 5 an si. Mah hlathlai bu nih CM cu zung ah voi 4 an auh i amah pumpak kai duh lo in a palai a thlah ton hna.

Ramkulh Hluttaw dihlak cheuli cheukhat (1/4) nih Pyine Hluttaw chairman (ohkathah) sin ah report an tuah hi a si. Hluttaw cheuthum cheuhnih (3/2) nih Chief Minister zumh awkthlak lo tiah hnatlaknak an ngeih hnu Rampi President sin report an tuah than. Hi report an tuah tik ah Rampi President nih Chief Minister rian dinhnak hi 2008 Phunghram upadi zong ah a um.

Cucaah, Kayah ramkulh Chief Minister U L. Phaung Sho cu NLD cozah chan ah Ramkulh Hluttaw nih a hmasa bik mi thlak a tonmi a si. Kayah ramkulh Hluttaw ah MP minung (20) chung ah NLD (9), Independent (1), Ralkap (5), USDP (4) le Kayah Democratic party (1) an si.

2020 June 18 ah Yangon Chief Minister U Phyo Min Thein zong an Hluttaw nih zumh awktlak lo tiah bia ceihnak an rak tuah bal. Nain, Yangon Ramthen Hluttaw ah mi a tam deuh nih CM U Phyo Min Thein lei an rak dirkamh caah biachahnak a rak um than lo tiah theih a si.#

Cc: DVB TV News

 

Na ruahning rak langhter ve.. (Leave a comment)

%d bloggers like this: