Kayah Chief Minister Cu Ramkulh Hluttaw Nih Phuah Dingin Bia An Chah_ President Sin Ca An Kuat Cang

Salai Bawi Lian Sang|TCP-Kalay| September 1, 2020| National League for Democracy (NLD) cozah chan ah Kayah Chief Minister (CM) U L Phaung Sho cu a rian tlaihmi in Ramkulh (Pyine) Hluttaw nih phuah dingin bia an chah I Rampi president sinah ca an kuat tiah thawng kan theih.

Kayah ram Chief Minister U U L Phaung Sho cu September (1) Pyine Hluttaw meeting ah zumh awk tlak lo 2008 phunghram Upadi 263 (A) in sualnak a ngei tiah bia an ceih I hluttaw MP dihlak 20 chung in MP 16 nih a sual ko an ti. MP 4 lawng nih a mah an dirkamh hi a si.

USDP cozah chan lio Theng Motor (JCB seh) 18 cu ramthen cozah nih mi a hlanh hna hlei ah Kayah day an tuahnak vawlei hmun cu Ramkulh Hluttaw nih hnatlaknak a rak ngei na tein CM nih vawlei hmun a hlanhnak sachok tuah in a mah pumpak pawcawnnak caaah a tuah tiah hlathlai bu nih an ti.

Kayah Chief minister an zumh lomi kong ah Cozah hlathlatbu cu August 14 ah an ser. Hruaitu Chairman ah U Te Ye, Chungtuan(Secretary) U Khin Maung Tun@ Naw Ei Kah le chungtel 3 an dihlak minung 5 an si. Mah hlathlai bu nih CM cu zung ah voi 4 an auh i a mah pumpak kai duh lo in a palai a thlah ton hna. Ramkulh hluttaw dihlak cheuli cheukhat nih Pyine Hluttaw Chairman sin ah report an tuah hi a si. Hluttaw cheuthum cheuhnih 3/2 nih Chief Minister zumh awkthlak lo tiah hnatlaknak an ngeih hnu Rampi President sin report an tuah than lai. Mah report an tuah tik ah Rampi President nih Chief Minister rian dinhnak hi 2008 Phunghram upadi zong ah a um.

Cucaah Kayah ramkulh Chief Minister U U L Phaung Sho cu NLD cozah chan ah Ramkulh Hluttaw nih a hmasa bik mi thlak a tonmi a si.

Kayah ramkulh Hluttaw ah MP minung (20) chung in NLD (9), Independent (1), Ralkap (5), USDP (4) le Kayah Democratic party (1) an si.

June 18, 2020 Yangon ram Chief Minister U Phyo Min Thein zong Ramthen Hluttaw nih zumhawktlak lo tiah bia ceihnak an rak tuah bal nain hluttaw tam deuh nih Phyo Min Thein lei an rak dirkamh caah biachahnak a rak um than lo tiah theih a si. Ref: DVB TV News