Kayah ram, hramhram in uknak lak caan kum 2 chung ah mipi 440 deng an thi
The Chinland Post | 2023 March 2 — Kayah ram le Shan ram thlanglei Moebye, Pekon peng chung ah SAC ralkap nih hramhram in uknak a lak hnu 2021 February 1 in 2023 February 25 tiang ah mipi sawhsawh 440 deng an thi cang tiah Progressive Karenni People Force – PKPF nih March 1 ah a thanh.
A thi mi chung ah SAC ralkap kut in a thi mi 309 an um i ralzaam dirhmun in a thi mi 130 an um tiah an langhter.
Ralzaam dirhmun in a thi mi hna chung ah sii-ai um lo ruang le SAC ralkap hriamngan nih khen ruang ah a thi mi an tam tiah theih a si.
Hramhram in uknak lak caan thla 25 chung ah SAC ralkap le Karenni phufonh hna karlak ah kahdohnak voi 586 a chuak i Karenni phufonh lei in 224 an nunnak a liam i SAC lei in 1,635 an thi tiah PKPF nih an cathanh ah an langhter.
Cun hramhram in uknak lak caan thla 25 chung Kayah ram ah SAC nih vanlei kahdohnak voi 197 a tuah leng ah biaknak lei inn 30 le mipi inn 1352 an hrawk cang tiah an langhter.
Hramhram in tlaih a tong mi hi 279 an um i thih ding in biakhiah mi le nunchung thongtla ding in biakhiah mi 7 an um tiah PKPF nih theihternak an tuah.
