Kayin Ramkulh Chung Tilianh Ruang Ah Sianginn 140 An Khar

0

City Hunter| 2018 July 30| Kayin ramkulh chung in peng 6 ah ruahsur tilianhnak a chuak i sianginn 140 hrawng caankarlaknak chung an khar tiah Kayin ramkulh fimcawnnak zung lutlai nih a chim.

July 22 thawk in ruah catlo in a sur ruang ah tlangcung tivati le Taanlwin tivapi a luh caah cacawnnak sianginn cheukhat caankarlak chung kharpiak an si. Cu hna cu; Ba-an peng ah sianginn 41, Hlaingbuaih peng ah sianginn 50, Phapon peng ah sianginn 13, Kawgaret peng ah sianginn 16, Kyar-in-seih peng ah sianginn 19 le Myawaddy peng ah sianginn pakhat, a zapi sianginn 140 cu caankarlak chung sianginn an khar. Zeitik ah dah hunpiak than an si lai timi aa fiang rih lo. Hi sianginn 140 in siangngakchia 27000 renglo cu cacawn lo in sianginn kharpiak chung an si.

Kayin ramkulh fimcawnnak zung lutlai U Soe Myint nih, “Ti a zor tik le caanrem a si tik lawng ah sianginn hun le cacawnnak thawk te ding in kan timhlamh. Sianginn textbook, catialnak cauk pawl an rawk. Cu a rawkmi airawltu ding zong timhcia in kan khawmhsuatmi a um cang” tiah a chim.

Kayin ramkulh lawng si lo in Mon, Kayin, Taningthari le Pago ramthen pali in tilianh harnak ruang ah milu 55000 hrawng hmun himnak ah an i thial cang. Dornak sakhaan 160 renglo an hun. Dornak sakhaan 161 in innchungkhar 11,000 renglo le milu 55000 an si.

July 28 zan Lasho khuapi ruahsur tilianh ruang ah inn 40 renglo a rawk i motor pakhat ti nih a phum.

Ref: RFA Burmese

About The Author

Na ruahning rak langhter ve.. (Leave a comment)

%d bloggers like this: