KhinOo, Theindaw khua kahdohnak ah PDF a thimi an tam
The Chinland Post | 2022 March 10 – Sagaing ramṭhen, KhinOo peng, Theindaw khua pawng ah March 8 in ralhrang le PDF pawl karlak ah kahdohnak a chuak i PDF lei in minung 11 nih ram caah an nunnak an pek. Ralhrang pakhat a thi tiah khuami hna nih an chim.
Ralhrang pawl an kalnak lam cungah PDF phu pawl nih bom an puahhnawh hna caah kahdohnak a chuah hi a si.
PDF hriamtlai 11 lengah ralhrang nih khamhnak caah an hmanmi mipi 2 zong thah an tong tiah khuami pakhat nih RFA ah a chim.
“Kyunlay khuami 3 cu khamhnak caah an tlaih hna. Hmandaw, Thayatpinwin khua le Theindaw khua mipi hriamtlai 11 zong an tlaih hna i an thah hna. Khamhnak caah an tlaihmi hna zong an thah beh hna. Ralhrang lei in pakhat a thi i aa hliammi zong an um. Khuami hna cu an zaam dih” tiah a chim.
Ralhrang pawl nih a pawngkam khua pawl zong hriamngan in an kah hna tiah a chim chap.
Ralhrang le pyusawhtee 80 hrawng an rak luh caah Kyunlay, Aungtha, Inpauk, Mutha, Theindaw khuami 1,000 leng an zaam tiah khuami hna sin in theih a si.
KhinOo peng, Hmandaw khua ah luancia March 5 zongah khuami Ko Myo Kyaw (kum-29), Ko Than Ngwe (kum-25), Ko Myo Tin (kum-26) pathum hna cu mei in an khangh hna tiah khuami nih an chim.
Sagaing ramṭhen hi ralhrang he kahdohnak a fah biknak hmunhma a si ruangah ralhrang nih van he vawlei he biatak tein kahdohnak a tuah hi a si.
Mahka hmunhma hna ah ralhrang a dirpi tu le mipi hriamtlai phu kan ser hna tiah mojor-genral Zaw Min Htun nih a chim.
Ref: RFA Burmese
