Khrihfabu nih Online pumhnak caah BUDGET a tawrel a herh

|Salai ZB Lian| — Covid-19 a karh lonak caah le khamhnak caah cun mibu he i pehtlaihnak, midang he i pehtlaihnak hrial (Social Distancing) hi a biapi bikmi a si tiah vawleicung ngandamnak bu (WHO) nih a chim. Nihin tiang Covid-19 zawtnak hi zorlei si lo in karhlei a si. Thla fakpi in cam le lungthawn, fimkhur te in nun khawh i zuam chin lengmang kan herh.

Vawleicung ram cozah hna nih an ram cio ah thawng an thanhmi zoh tikah aralaimi April 30 tiang bupi i tonnak, pumhnak tuah lo ding a timi deuh an si. Cun April 30 pinlei zong ah Covid-19 zawtnak dirhmun umtuning in a nicaan zong sauh ding an ti dih. Kawlram cozah zong nih April 30 tiang a kham i a herhning in chap zong a si te lai ti a si.

Cucaah Khrihfabu zong April 30 tiang cu biakinn cio ah hmunkhat ah kan i pum ti kho lai lo. Online tu in thawngthabia i hrawmhti le Pathian he pehtlaihnak hmanti kan hau rih lai.

Kawlram lei zong March 29 in Khrihfa bu kip nih Online (a bik in Facebook) in pumh caanhmannak thok cio a si. Khrihfabu biakinn cio nih mah le Facebook Page in Online LIVE in pumnak Program cu thlah cio a si.

Tuzing Hakha Khrihfabu pumh caanhmannak cio zoh tikah Online Live in a rak i pummi hi buaktlak in minung 150 cio an si. Chungkhar in tuak ahcun chungkhar 150 cio buaktlak in an i pum kho kan ti lai. Cheukhat Khrihfabu Live thlahmi cu zoh a har. Khrihfabu cio Online Live in pumh caanhmannak thlah a si bal lo tikah Live thlahnak ah a herhmi seh thilri, camera, sound system tbk a herhbau caah a si.

Online in pumhcaan zarh nga tluk aa duh rih. Hi aa duhmi zarh nga Online pumhnak ah Khrihfabu nih mah le chungtel cio tlamtling in an i pumh khawh nakhnga Budget Tawrel kho sehlaw aa tha tuk hnga.

1. A si khawh ahcun Online in thlahnak a herhmi thilri i zalh kho cio sisehlaw a tha tuk hnga. Hakha cu Lian Hakha nih a ngeih i, HBC pumnak a thlah tikah sia a rem i zoh zong anuam. Cu bantuk in Khrihfabu cio nih i zalh kho cio sisehlaw a ttha tuk hnga.

2. Khrihfabu nih mah le chungtel ONLINE pumhnak caah bawmhnak budget tawlrelpiak hna sehlaw a tha tuk hnga. Abik in Simcard Top-up hi inn khat in 3000 – 5000 ks karlak bawmh sisehlaw a ttha tuk hnga. Hihi Khrihfa sinak in pumhnak ahcun Khrihfabu nih tangka pek cu aa dawhcah lo bantuk a lo nain, Khrihfabu le chungtel kan i pehtlaihnak tuanvo a langhtertu a si hnga. Cun, khatlei in Khrihfabu ah siifah chungkhar, ngahtah le hmeinu hmeipa caah an i pumh khawhnak, thawngtha an ngaih khawhnak si hnga. Internet hmannak caah tangka rawnnak a ngei lomi chungtel tampi kan um men hnga.

Chim duhmi cu hi lio caan bantuk ah Khrihfabu le chungtel i pehtlaihnak, tuanvo le i zohkhenhning kha a si. Chungtel nih mah le inn in 10/1, thawhlawm le a Khrihfabu rian pakhat hmanh tlolh lo in Khrihfa sinak nunzia a langhter a herh. Cu bantuk in, Khrihfabu nih tubantuk kan tonmi harnak caan lio ah mah chungtel he i pehtlaihning a tuanvo kha chim duhmi a si.

Chungtel a simi paoh nih Khrihfabu lei in pumhnak caah Simcard rawnnak cu a phung si lo, kanmahte in kan i cawk ko lai an ti ko lai. Cheukhat nih Top-up pek zong ah a dang ah an hman lai ti ruah zong afawi. Mah bel cu mah le Pathian pehtlainak le dinfelnak ah aa hngatmi a si. Asinain Khrihfabu nih Online pumhnak caah bawmhnak cohlang, peknak nih Khrihfabu he ipehtlainak tuanvo ah siseh, minung thinlung ah siseh rian a tuan deuh hnga.

Chungtel chungkhar inn 800 a ngeimi kha inn khat ah 5000 Ks cio bawmh sisehlaw a dihlak 400,000 Ks a dih hnga. Cucu Khrihfabu pawl caah thilrit tuk a si lai tiah ka ruat lo.

Khatlei in Khrihfabu nih chungtel pawl Online in an i pumh thiamnak ah, Online hmanning chimh, Internet Data cawkning chimh zong biapi pakhat ah aa tel ve. Online in pumnak caan ngeih kho ding ah Internet a hmang thiam lomi tampi an um men lai.

Cozah lei nih siseh, zatlang bu lei nih siseh, ngandamnak lei nih siseh phun tampi in Covid-19 dohnak ah chawva in siseh, bawmhnak in siseh tampi rian an tuan. Cu ve bantuk in Khrihfabu zong nih tampi a tuan ve. Abik in Khrihfa chungtel cio siaremte in le tlamtlingte in kan i pumh khawhnak caah a cunglei ka chimmi hi Khrihfabu cio nih tawlrel cio sisehlaw a va tha tuk hnga.

A donghnak, Covid-19 zawtnak nih miphun, biaknak, mirum le mi sifaak thleidan lo in a kan tlak dih. Hi nih Pathian sermi minung aho paoh kan i tluk zia, thleidan awk kan si lo zia a langhter. Abik in Khrihfami kan zumh hneksaknak le Pathian he kan i pehtlainak ah hneksaknak pakhat zong a si. Hi lio caah Pathian he i hlat si lo in, kan i naihnak, Khrihfabu le pakhat le pakhat zawnruahnak a karhnak tu si ko seh.

Pathian lawng zeipaoh thil ti kho tu a si. Pathian nih himbawmnak kan pe ko seh. Vawlei, kan ram, kan miphun le kan Khrihfabu, pumpak cio himnak hmu hram ko hna usih.

Hi capar cu The Chinalnd Post ruahnak le pommi si lo in catialtu pumpak hmuhning a si.