Khuafo Ah SAC Nih Vanlawng In Bom An Thlak, Loklung khua Hriamngan In An Kah
The Chinland Post | 2023 August 14 — Chin ramkulh, Thantlang peng Khuafo khua cu SAC nih vanlawng in bom an thlak bantuk in Hakha peng Loklung khua zong hriamngan in an kah caah biakinn telh in mipi inn cheukhat a rawk tiah theih a si.
August 13 zaan sml 11:00am hrawng ah Hakha hrambunh SAC LIB 266 nih hriamngan an kah thlorh i cu an kah mi hriamngan cu Loklung khuachung ah a tlak caah mipi inn 3 a rawk, minung 1 aa hliam tiah theih a si.
“Nizaan rianṭuannak in kan ṭin hnu ah loklung um mi kan chung pawl nih an kan chawnh i khuachung ah hriamngan a rak tlak caah inn 3 a rawk. Minung pakhat zong aa hliam tiah a ka chimh” tiah Hakha khuasa mi pakhat nih The Chinland Post ah a chim.
Cu bantuk in August 14 zinglei sml 10:30am hrawng zong ah Tada Oo vanlei ralkap nih an rak thlah mi SAC Jet cu Hakha cung in a zuan hnu ah Khuafo khua ah bom a va thlak caah Baptist Biakinn le Pastor inn a hrawk dih tiah thawng theih a si.
Atu bantuk in vanlawng rak thlah in mipi umnak khua ah bom a thlak hramhram nak a ruang hi Thantlang khuachung ah a um mi SAC Haukabung sakhaan cu Chin ralkap hna nih an kah i sakhaan an lak khawh beh leng ah ralkap 2 a nung in an tlaih hna i meithal zuun 6 zong an lak khawh ruang ah a si kho men tiah an ruahdamh.
