Khuafo Khuate Ah SAC Nih Jet In Bom A Thlak Ruang Ah Hngakchia Telh In Sualnak Ngei Lo Mipi 10 an Thi, 20 Hrawng Hliam An Tuar
The Chinland Post | 2023 March 30 — Chin ramkulh, Thantlang peng, Khuafo khuate ah SAC nih March 30 zinglei sml 10:20am hrawng ah Jet Fighter 2 in bom a thlak caah hngakchia telh in sualnak ngei lo mipi 10 an thi i 20 hrawng an i hliam tiah theih a si.
SAC Jet nih bomthlak ruang ah a nunnak a liam mi chung in kum 18 tang hngakchia 4 zong an i tel tiah theih a si.
A nunnak a liam mi hna cu Sung Hlei Cuai (kum 30), Ngun Dawt (kum 28), Hmet Lian (kum 20), Par Ṭha Iang (kum 18), Len Zi (kum 40), Sofia (kum 16), Van Duh (kum 6) le Siang Cung Bik (kum 9) hna an si tiah theih a si.
Cu lawng siloin, hliam a tuar mi chung zong ah kum 18 tang hngakchia 5 an i tel tiah thawng theih a si.
Hliam a tuar mi hna cu Ngun Hoi (kum 40), Biak Ṭial (kum 50), Iang Par (kum 61), Peng Cung (kum 6), Benjamin (kum 1), Bawi Dawt (kum 6), Sai Thluai (kum 11) le Lungzarh khua in Van Cem (kum 17), Bawi Lian Tlung (kum 18) hna an si tiah theih a si.
A cunglei langhter mi hi a nunnak a liam mi le hliam a tuar mi chung in The Chinland Post nih a khawmhsuat khawh zat cazin a si. Pehzulh in thawng tling le thawng fiang thanh khawh kan rak i zuam ṭhan te lai.
About The Author
