Khuangcawi Le Paih Tuahnak Ca I Budget Tlawmbik An Chiahmi Cu Lungrawk Bak An Si
Tawk Tling Thang| 2019 February 13| Chin ramkulh huap in tukum Hakha ah tuahdingmi Chin Miphun Ni caah cozah nih budget sing 500 hrawng a tuakchunh. Chin Miphun Ni a nuamhtertu biktu Paih tuahnak le khuangcawinak caah budget tlawmbik a chiahmi cung ah Hakha upa cheukhat an lung a tling lo tiah kan theih.
Hi kong he pehtlai in min langhter a duh lomi Hakha khuanu khuapa in upa pakhat nih, “Chin Miphun Ni hi zeidang nakin Paih le Khuangcawi nih mi a nuamhter bik lengmang hna. Hi tluk a biapimi thil pahnih caah budget ks. sing 60 lawng a chiahpiakmi hi cu lungrawk bak a si ko. Zeidang a herh tuk lomi ah ks. sing 100 le sing 200 tiang a chiah fawn. A taktak ahcun Chin Miphun Ni khi khuangcawi a dih le paih a dih ahcun zeihmanh a nuamhnak a nuam ti lo, puai a dih cang ti tluk khi a si. Hi ruang ah Hakha sangkip khuabawi nih khuangcawi tuanvo laak an ngamh ti lonak hi a si. Piahkhaan saknak le khualtlung zohkhenhnak tibantuk ca hna hi budget tamtuk hman an timhmi khi ngaihchia ngaingai a si. Khuangcawi le Paih ca tu ahhin budget tamdeuh an chiah khun awk a si” tiah The Chinland Post ah a chim.
Hi kong he pehtlai in Hakha khuahlun in upa pakhat nih, “Khuangcawinak caah ks. sing 30 kan in chiahpiak hna an ti nain an kan pek taktakmi cu ks. sing 10 lawng a si theu. Hi ruang ah cozah nih budget tamdeuh pi in an tuah lo ahcun khuangcawi hi ahohmanh nih tuanvo an la duh ti lai lo. Tukum zong, ahohmanh nih an laak duh lo caah Senthang an fial hna nak hi a si phah. Khuang kan cawi fatinte cawimi chungkhar nih a tlawm bik sing 30 in sing 50 tiang an dih theu” tiah The Chinland Post ah a chim.
Tukum Chin Miphun Ni tuahnak caah cozah nih a zapi ks. sing 500 hrawng hman ding a timh. Cu chung in Khuangcawinak caah ks. sing 30 le Paih tuahnak caah ks. sing 30 lawng in an tuaktaanpiak hna. Hlasaknak caah ks. sing 100 le khualtlung zohkhenhnak caah ks. sing 200 renglo le piah-khan saknak tibantuk caah a dang cu hman dih an timh tiah theih a si. +++
About The Author
