Khuapau Dohtlennak Ah Chin Miphun Lungrualnak Hi Miphun Dang Dohthlennak Bu Caah Zohthla Mi Si Ding A Herh Tiah NUG Acting President Nih A Chim

The Chinland Post | 2025 March 5 — Khaupau dohthlennak tuah lio caan ah Chin miphun pawl lungrualnak hi dohthlennak a tuahmi miphun dang hna nih zohchunhawk tlak si a herh nak le Chinland Council (CC) le Interim Chin National Consultative Council/Chin Brotherhood (ICNCC/CB) lungrual le tanti a herhnak kong National Unity Government (NUG) Acting President Duwa Lashi La nih March 4 NUG Meeting tuahnak ah a chim.

Hi kong he pehtlai in, NUG Acting President Duwa Lashi la nih “Atu lio CC le ICNCC/CB karlak ah funtomnak lei ah karhlannak an timh cuahmah lio theih a si caah, kanmah NUG lei zong kan i lawm tiah a chim.

Cun, a biapi in ramchung ramleng Chin miphun vialte zong nih Chin miphun funtomnak caah khuakhan lairel mi cu an i lawm cio kong kan theih tiah a langhter tiah theih a si.

Khaupau dohthlennak tuahcuahmi caan chung ah Chin miphun lungrualnak hi dohthlennak a tuah mi miphun dang hna nih zohchunh awk si a herh ko. State Administration Council (SAC) ralhrang dohnak ah hriamtlai bu tampi an hun um mi hi thazaang tampi a um. Asinain, dohthlennak bu vialte funtomnak in lungrual mi bu nganpi ser in thazaang thawn chin a herh” tiah NUG Acting President nih a chim. 

Chinland Council le Interim Chin National Consultative Council/Chin Brotherhood (ICNCC/CB) zong Chin miphun karlakah Council Bu pahnih um a herh lonak le kaphnih hna thlaknak he council pakhat a thar dirh ding — Chin National Council (CNC) tiah a min dirh ding siseh, Chin National Constitution Drafting Committee hruai. ning tuah in CC le ICNCC/CB ton biaruah hnatlaknak cu 2025 February 26 ah cathanh an chuah a rak si.