Khuate Thanchonak Zung Nih Hakha Pengkomh Khua 16 Ah Solar Mei An Bunhpiak Hna

0

Salai Cung Cung |2018 July 31| Chin ramkulh khuate thanchonak (Celet) zung nih 2017-2018 budget kum chung Hakha pengkomh ah solar mei khuate khua 16 an bunhpiak hna tiah kan theih. 

Hakha pengkomh chung in Hakha peng ah Solar mei bunhpiak cangmi khua hna cu; Buanlung, Farrawn, Vanha, Ruan, Keipaw, Haiphai le Hata khua an si. Thangtlang peng ah Congthia, Khuabung, Leitak A, Phaikhau, Lungcawipi, Vanzang, Aibur, Lulpilung le Hlamphei an si.

Solar mei cu innkhat pakhat in an bunhpiak hna. Cun, khuachung lam mei, sianginn mei, ngandamnak lei zohkhenhnak (sii-inn) inn mei le biakinn mei zong an tuahpiak chih hna. Bawmhnak pekmi ning le solar mei bunhpiak ning cu a tanglei bantuk in an si.

1. Ruan: innchungkhar 61 caah solar 61 pin ah sianginn mei, lam mei le biakinn mei caah solar 9 an bunhpiak hna.
2. Farrawn: innchungkhar 61 caah solar 61 pin ah sianginn mei, sii-inn mei, lam mei le biakinn caah solar 8 an bunh.
3. Haiphai: Innchungkhar 21 caah solar 21 pin ah a dangdang caah solar 4 an bunh.
4. Hata: Innchungkhar 56 caah solar 56 pin ah a dangdang caah solar 9 an bunh.
5. Keipaw: Innchungkhar 6 caah solar 6 pin ah a dangdang caah solar 3 an bunh.
6. Buanlung: Innchungkhar 155 caah solar 155 pin ah a dangdang caah solar 17 an bunh.
7. Vanha: Innchungkhar 63 caah solar 63 pin ah a dangdang caah solar 9 an bunh.
8. Congthia: Innchungkhar 163 caah solar 163 pin ah a dangdang caah solar 19 an bunh.
9. Hlamphei: Innchungkhar 33 caah solar 33 pin ah a dangdang caah solar 9 an bunh.
10. Khuabung: Innchungkhar 107 caah solar 107 pin ah a dangdang caah solar 13 an bunh.

11. Phaikhua: Innchungkhar 63 caah solar 63 pin ah a dangdang caah solar 7 an bunh.
12. Lungcawipi: Innchungkhar 38 caah solar 38 pin ah a dangdang caah solar 14 an bunh.
13. Leitak A: Innchungkhar 24 caah solar 24 pin ah a dangdang caah solar 6 an bunh.
14. Vanzang: Innchungkhar 108 caah solar 108 pin ah a dangdang caah solar 12 an bunh.
15. Aibur: Innchungkhar 118 caah solar 118 pin ah a dangdang caah solar 20 an bunh.
16. Lulpilung: Innchungkhar 41 caah solar 41 pin ah a dangdang caah solar 9 an bunh.

“Hi solar mei kan bunhpiakmi hna khua hi anmah lei he kanmah lei he tangka thawh cio in tuahmi asi. Tahchunhnak ah solar watt 30 ah tangka 30,000, watt 45 ah 50,000, watt 60 ah 70,000 tibantuk in kan khawlh hna. Hi solar mei kan pek mi hna hi khuakip ah pek an si lo, anmah le khua cio in rak kan tuahpiak ve u, kan duh ve ko tiah tangka zong kan thawh ve ko lai a timi khua lawng bawmhnak kan pek hna. Cheukhat cu khuakhat ah innchungkhar 50 nih bunh ding in a kan ti. Asinain, solar mei bunhding tuanvo ngeitu hna an va kal tikah khuami nih an hmuh hna i kei zong ka duh than ve tibantuk a tam. Cu caah khua pakhat ah innchungkhar 90 leng nih hnatlaknak an ngeihnak paoh cu kan bunhpiak ko hna” tiah Chin ramkulh Khuate thanchonak zung in Deputy Director U Tam Aung nih The Chinland Post ah chim.

Hi solar bawmhnak cu innchungkhar paoh hi alak in bawmhnak pek an si lo, sii-inn mei, sianginn mei, lam mei le biakinn mei pawl lawng hi alak in bawmh an si tiah kan theih. +++

About The Author

Na ruahning rak langhter ve.. (Leave a comment)

%d bloggers like this: