Khuathar No. 2 Sianginn Pawng Ah Sak Timhmi Shopping Mall le Hotel Duhlonak Minthut An Khawmh

Ral Hmung Certual le No. High School, Khuathar

TCP Hakha| 2019 December 02| Chin Ramkulh cozah Sipin tawlrelnak in Hakha Khuathar No. 2 Siangsangrun (High School) hmuhma pawng i hman cuahmah liomi certual hrawh in Shopping Mall le Hotel ngan saknak ding timtuahnak kong ah Hakha um Mino cheukhat hruainak in duhlotu minthut cazin khomhnak an tuah.

Change.org Website ah Online in min cazin khomhnak an tawlrel i nithum chungah minung 500 leng nih dohlonak an langhter cang tiah kan theih.

Min langhter duhlomi Hakha khuami pakhat nih, “Hakha a thancho cu kan duh dih. Nain, a tha mi le a dikfelmi thanchonak a si ding kan duh. Ral Hmung Certual hi hrawh in, Shopping Mall le Hotel sak hi Khuanu/pa nih kan timhmi a si ballo. Sianginn a thlang bel ahkhin hmun lawnh in sak ahcun a tha hnga timi cu kan ceih balmi le saduhthah a si” tiah the Chinland Post ah a chim.

Hakha mino lak ah bochanmi Youth Corner (Hakha) ah hruaitu a simi, Dr. Biak Cung Lian @Cungpi nih, “Atu ah mipi nih thimmi cozah kan si an ti. Nain, Mipi sin ah zeihmanh ruahnak an lakmi a um lo. Cun, khua sersiamnak (town plan) an tuahmi le Hakha khualipi thanchonak an tawlrel ning hi a tha lo tuk. Lungtlin ding a har ngai. Hakha hi hitining in a than ahcun, than tha lo a si sual lai. Slum (ram dang i tha tein tawlrellomi mi sifak umnak hmunhma) duh poah in innsak i an umnak phun a si lai ti ka phang. Hakha town plan an tuahmi ah, zapi tlawnlennak hmunhma an tel le tello hmanh zapi nih hngalh a si lo lio ah, a um ciami zapi hmunhma (public space) zong an zuah lo. A um ciami an hrawh i a thar zong an tuah fawn lo. Atu ah Hakha View Point zong zapi caah a si tilo, a hlan ah a lakte in duhpoah tlawnlennak a si nain, a tu cu man pek in luh a si cang.”

“Cun, kanmah mipi zong hi mawhchiat awk kan si. Mipi nih awaan kan chuahmi a tlawmtuk. Kanmah hrim ah theihkauhnak tampi in tuah a hau. Mipi nih cozah he naihniam tein riantuanti kan duh ko. Nain, a um thiam fawn lo” tiah a chim.

Hakha mino in min langhter duhlomi pakhat nih, “Ralkap cozah chan le demokaresi kan si hlan ahcun sisehlaw zei ti tha kan ti hnga. Atu ahcun, kanmah nih kan thimmi hna hruaitu an si. Atu bantuk an thil tuahmi hi cu anmah an cozah tlai liomi hnu chittertu ding tuahsernak a si. Mipi nih an thim ti hna lai lo. Ralkap chan ah, Chin Oo Sii Sianginn an hrawh i, Cozah zungpi an sak cang. Atu ah, Sianginn kam ah, Shopping Mall le Hotel kan sak lai timi cu a phung le suallam zong a si lo” tiah a chim.

Dr. Cungpi nih amah pumpak Social Media hmanmi Facebook ah duhlonak langhtermi “Leave us a better space” timi catar cu tulio laihlum mino karlak ah Profile hmanthlak ah an thlen ngai tiah kan theih.

Hi kong ah Dr. Cungpi nih, “keimah lungtho tein ka tuahmi a si ko. Ahohmanh zong ka sawm hna lo. An thlen ciomi kan hmuh khawhmi cu mi tampi an lung a rak fak cio tinak a si” tiah a chim.

2019 November 25 nithla khenh in, Chin Ramkulh cozah nih Shopping Mall le Hotel sak dingmi thanhnak an tuah. An cathanh ah an langhtermi Developer an herhnak le Khualipi a sinak in a herhmi a sinak lawng an langhter. Cun, hi inn an saknak ding ah a dihmi hi khawika dah an lak lai i, zeitindah cham than a si lai. Aho nih dah a liam chung lai timi zong fiang in theih a si lo.

Leave a Commnet

%d bloggers like this: