KIA Sin Training Kai A Tli Thanmi CNA Ralkap Pahnih Yangon Ah Tlaih An Tong

The Chinland Post| 2018 Tho 24| Kawlram Kahngol Hnatlaknak (Nationwide Ceasefire Agreement _NCA) minthu Chin National Front (CNF)/Chin National Army (CNA) ralkap pahnih cu KIA training in an rak tli i phungning lo hriamtlai bu (unlawful association) he pehtlaihnak phung 17(1) in Yangon an riahnak ah October 22, 2018 zanlei ah an tlaih hna tiah thawng kan theih.

Hi tlaihnak kong he pehtlai in Kawlram President zung lei in CNF upa bia an hal hna nain thil sining van hlathlai ta lo ahcun chim ding kan ngei rihlo tiah an leh hna.

Atlimi CNA ralkap Salai Ning Tun le Salai Aung Yaing Ling nihcun Chin ramkulh Mindat in Kachin Laiza khua Mon Saing khuate ah kan phan i NCA min a thu rihlomi Kachin Independence Organization (KIO) sin ah Ralkap Bawi sinak training kai dingin kan ithawh i Training kai ding kan huam tilo caah Kachin ramkulh Myitkyina in Yangon ah kan rak zam tiah an chim. Yangon an umnak South Dagon ah South Dagon Palek nih October 22, 2018 an kawl hna December Residence inn pakhat ah an tlaih hna. South Dagon palek nih pa 1830/2018 Phungning lo bu he pehtlaih upadi 17(1) in October 23 ah taza an cuai hna tiah theih a si.

Hi kong he pehtlai in Kawlram President Zung nih CNF upa hna sin October 23 ah thawngtheihternak an tuah hna nain CNF Vice Chairman Dr. Salai Lian Hmung Sakhong nih hi tlaihnak kong he pehtlai in CNF taktak an si le silo le felfai tein kherhhlainak kan tuah hmasa lai, tu ahcun zeihmanh chim ding kan ngei rihlo tiah Myanmar Times ah a chim.

Hi kong he pehtlai in CNF AGS III Pu Thet Ni nih a tu tlaihnak thil sining kongah CNF lei in chim ding kan ngei rihlo. Thil sining kan van hlat hmasa hnu lawngah chimh a herh ahcun kan chim than te lai tiah The Chinland Post ah a chim.

Salai Ning Tun hi Sagaing akai lio ah a Facebook in ramkhel kong ti ruangah Sagaing Natala College bawizik nih ka in a rak phuahmi a si. Kachin a kal ti thawng cu ka theih. Cun khoika a kalnak paoh ah Facebook ah catial, hmanthlak tar tbk a tuah tikah Palek pawl nih an zul dawi i an tlaihmi a si lai tiah amah he aanaihniammi pakhat nih The Chinland Post ah a chim.

Chin National Front cu 2012 January 6 ah Kawlram Cozah, Ramkulh Cozah zung he kahdaih ngol hnatlaknak min an thu i Kawl pumpi huap kahdaihnak (NCA) zong October 15, 2015 min a thumi an si.

Ref; Myanmar Times + TCP

Na ruahning rak langhter ve.. (Leave a comment)

%d bloggers like this: