Kim Jong Un: Nuclear Hriamnam Hrawhnak Kong American He I Chawnhbiak Ding Timhcia Ka Si
City Hunter| 2018 April 9| North Korea ram nih a ngeihmi nuclear hriamnam pawl hrawhnak kong ceihmainak ding ah timhcia ka si ko tiah biakamhnak a chim tiin American cozah tuanvo ngeitu hna nih an chim.
American President Donald Trump le North Korea hruaitu Kim Jong Un a dangte in a sang bik biaruahnak ding timhtuah ceihmainak ngeih a si lio ah North Korea leikap nih nuclear hriamnam kong ah ceihmainak ngeih a duhnak bia a phuan tiah April 8 ah thawngpang a chuak.
North Korea hi nuclear hriamnam kong he pehtlai in hlan deuh ahkhan South Korea bialamkaltu palai phu sin in American cu a rak sawm. Atu cu nuclear hriamnam kong kan i ceih lai tiah American cu a hmasa dengteo in a sawm.
“Kim Jong Un nih Korea rili fonghlei ah nuclear hriamnam hrawhnak kong i ceihmai ka duh a timi cu American nih a fehter” tiah President Trump cozah bu in tuanvo ngeitu pakhat nih The Wall Street Journal le Washington Post sin, April 8 ah a chim.
Trump le Kim Jong Un a dangte biaruahnak caah American le North Korea mingia thlaitu lutlai hna cu ramthumnak a simi ram pakhat ah i tong in ceihmainak an ngei lengmang tiah theih a si.
American President Trump le North Korea hruaitu Kim Jong Un tuanbia lut ding a sang bikmi ton biaruahnak cu a ralaimi May thla chung ah tuahding in an timh. Hi ton biaruahnak cu atu lio rian a tuan cuahmahmi American President pakhat nih North Korea hruaitu a hmasa bik ton biaruahnak a ngeih a si lai.
North Korea hruaitu Kim Jong Un nih March thla dongh ah Tuluk ram ah kal in President Xi Jinping zong ton biaruahnak a va ngeih.
Tuluk President he ton biaruahnak an ngeih lio ah nuclear hriamnam he pehtlai in rikhiahmi he aa tlak in ka hlawt lai tiah Kim Jong Un nih fek ngai in a chim tiah Xinhua thanhca nih a langhter.
“Korea rili fonghlei i nuclear hrawhnak hi ka tawlrel khawh. South Korea le American le kan i zuamnak hi thatnak lei in an lehrulh i ramchung remdaihnak le dainak an ser i a dikfelmi remdaihnak an ser taktak a si ahcun” tiah Kim Jong Un nih a chim.
North Korea hruaitu Kim Jong Un nih April thla chung ah South Korea President Moon Jae-in ton a timh tiah theih a si.
Ref: Duwun
About The Author
