Kim Le Trump Nih Biahren Pakhat Min An Thut I Nuclear Hrawhnak Rian An Thawk Lai

0

City Hunter| 2018 June 12| North Korea ram hruaitu Kim Jong-un le American President Donald Trump nih June 12, Singapore i a sang bikmi ram hruaitu tonbiaruahnak ah a biapi tukmi biahren pakhat min an thut cang. North Korea nuclear hriamnam hrawhnak an thawk colh lai tiah kan theih.

Hnatlak minthutnak hmun ah American President Donald Trump nih, “Nihin ah min kan thutmi cu a biapi tuk hringhranmi le a tlamtling taktakmi biahren pakhat a si. Hnatlaknak kan ngeihmi biahren hi a thuk tukmi le a kau tukmi le a tling tukmi a si. Tuanbia roling ton biaruah ceihmainak kan ngeih dih hnu ah kanmah nih a luancia tuanbia kan kaltak khawh cang” tiah a chim.

North Korea ram hruaitu Kim Jong-un nih, “Hi biahren minthutmi hi tuanbia roling biahren a si. Kan ramhnih nih a luancia tuanbia vialte kaltak ding in biakhiahnak kan tuah cang. A biapi tukmi thlennak pakhat cu a rauh hlan ah vawleipi nih a hmuh cang lai” tiah a chim.

“Vawleicung hruaitu hna nih an hrial i a lileng bikmi ram pakhat he a thami pehtlaihnak kan thawk khawh cang tiah American President Donald Trump nih a chim. Mr. Kim Jong-un hi fimthiamnak a ngeimi a si i a ram a daw taktaktu pakhat a si” tiah Donald Trump nih a thangthatnak bia a chim.

North Korea ram nuclear hriamnam hrawhnak an tuah lai maw timi biahalmi cung ah, ‘hi nuclear hriamnak hrawhnak lamthluan cu a rannak in thawk le tawlrel a si lai’ tiah White House in chimnak ngeitu nih a chim.

Nihin ah kaphnih ram hruaitu pahnih nih hnatlaknak ngeihmi min an thutnak an ngei. Cu min an thutmi biahren a dikthliar cu a rauh hlan ah kan thanhchuah ko lai tiah White House lei nih an chimphuan.

Singapore ah tuahmi Donald Trump le Kim Jong-un tuanbia roling ton biaruahnak cu hlawhtling ngai in an lim cang. A biapi tukmi biahren pakhat hnatlak minthutnak zong an ngei kho.

A luancia tuanbia vialte kaltak ding in biakhiahnak kan tuah cang. Vawleipi nih a biapimi thlennak pawl a hmuh cang lai tiah Kim Jong-un nih holhlettu sin in a chimphuan.

US President Trump le N. Korea ram hruaitu Kim Jong-un cu June 12 , Singapore ram Sentosa Tikulh ah tuanbia roling tonbiaruahnak an ngei.  Ramhnih hruaitu hna cu Sentosa tikulh ah Five Star level simi Capella Hotel ah an i tong.
Ref: BBC Burmese, Xinhua News

About The Author

Na ruahning rak langhter ve.. (Leave a comment)

%d bloggers like this: