KIO/KIA he raltuk, ramkhel ah tangrualṭi ding in timhcia kan si: AA, TNLA le MNDAA
Northern Alliance hriamtlai phu thum fonh - AA, TNLA le MNDAA
Post Staff | 2022 February 5 — Arakan Army (AA), Ta’ang National Liberation Army (TNLA) le Myanmar National Democratic Alliance Army (MNDAA) phufonh nih Kachin Independence Organization/Army (KIO/A) he ramkhel lei siseh, raltuknak lei siseh rianṭuanṭnak kan ngei cang lai, timh cia kan si tiah a voi 61 nak Kachin dohthlennak ni ah kuatmi conglawmhnak cakuat ah an ṭial.
Ramkomh Kawlram chungah namnehnak a tongmi miphun hna hi miphun tlukruannak, mah tein khuakhan lairelnak, mah tein biakkhiah khawhnak, miphun he pehtlai in kan sunghnak le mah le miphun hna nih kan ngeihmi kan innlo le sui ngun chawva pawl humhminnak caah hriamtlaih in dothlennak kan tuahnak a si tiah Chaklei hriamtlai phufonh a simi (Northern Alliance) nih Kachin miphun dothlennak ni cu Kachin miphun tluk tein man kan ngeihter tiah cakuat chungah an telh chih.
AA le TNLA cu KIO/A nih hrinmi kan si bantukin KIO/A cu ramkhel lei, raltuknak lei zongah hawikomhmi phu an si i limhang ṭha tein a ngeinmi phu a si. Kachin ram le Kachin miphun hna cungah lunglawmhnak tampi kan ngei tiah thawng an thanh.
Hi Chaklei hriamtlai phu fonh (Northern Alliance) phu 4 hna cu a hlan lio tein ramkhel lei, raltuknak lei zongah lungrual tein a ṭangṭmi kan si bantukin a tulio ramkhel lei le raltuknak lei zongah ṭangṭi dingin timh cia kan si ko tiah phu thum fonh nih cathanh in an langhter.#
About The Author
