KNLA he kahdohnak voi 100 leng ah BGF 90 deng an thi
The Chinland Post | 2022 August 3 – KNU nih a tlaihnak hmunhma Papun pengkomh ah KNLA battalion 5 le SAC kuttang BGF karlak ah kahdohnak voi 100 leng a chuak i BGF ralbawi telh in 90 deng an thi tiah KNLA battalion 5 nih thawng a thanh.
July 1-31 tiang thlakhat chung kahdohnak voi 100 leng chungah BGF 88 an thi, 57 an i hliam i hliam a tuarmi chungah battalion commander le Sergeant zong an i tel tiah a langhter.
Cu lengah, hriam le kuan a phormi SAC ralkap mawṭaw pakhat kan hrawh khawh tiah battalion 5 nih a thanh.
KNLA lei in a thimi an um lo nain hriamtlai 9 hliamhma an pu tiah cathanh chungah a telh chih.
SAC ralkap le KNLA battalion 5 karlak kahdohnak ah SAC lei nih hriamngan tampi a hmanh i khuami umnak le lo ah a kah hram caah mipi 2 an thi, 5 an i hliam tiah theih a si.