KNU hmunhma pawl thla 6 chung kahdohnak ah SAC ralkap 2,200 leng an thi

The Chinland Post | 2022 July 7 – Karen National Union (KNU) tlaihmi hmunhma pawl thla 6 chung ah kahdohnak voi 2,600 leng a chuak i SAC ralkap le Border Guard Force (BGF) 2,200 leng an thi tiah KNU nih a thanh.

KNU Kawlaythu tlaihmi hmunhma chungah Karen National Liberation Army (KNLA), Karen National Defense Organization (KNDO) le SAC ralkap, BGF karlak ah nifatin kahdohnak a chuak i thla 6 chungah kahdohnak ngan/hme voi 2,686 a chuak. Cu kahdohnak ruangah SAC ralkap le BGF 2,208 an thi i 1,545 an i hliam tiah a langhter.

SAC ralkap le BGF a tambik an thihnak thla hi March le April a si i SAC ralkap 500 leng veve an thi. Thla 6 chungah ralkap an thih a tlawmbik thla hi June a si i ralkap 365 an thi tiah a thanh.

Kahdohnak chungah KNDO,KNLA lei in 84 an nunnak a liam i 175 nih hliamhma an tuar.

SAC ralkap nih van lei in kahdohnak a tuah ruang, khuate ah hriamngan a kah ruang le a ruang um loin mipi a thah caah mipi 72 an thi i 155 hma an pu tiah a thanh.

Kahdoh tambik a chuahnak hi KNU battalion 5 hmunhma Papun pengkomh, battalion 6 hmunhma Dupala pengkomh, battalion 1 hmunhma Thaton pengkomh, battalion 3 hmunhma Nyaunglaypin pengkomh le battalion 2 hmunhma Taungoo pengkomh an si i battalion 4 hmunhma Dawei pengkomh ah kahdohnak tlawmpal a um ve. Battalion 7 umnak Ba An pengkomh ahcun kahdohnak a um lo tiah an langhter.

A cunglei langhtermi kahdohnak pawl ah PDF le KNU kuttang phu pawl fonh in kahdohnak an tuah hi a si.

Na ruahning rak langhter ve.. (Leave a comment)

%d bloggers like this: