Kokang Kahdohnak Ah SAC Lei 20 An Thi, Hriam Tampi An Lak Khawh
The Chinland Post | 2023 June 6 — Shan ram, Kokang hmunhma, MNDAA le SAC ralkap karlak kahdohnak ah SAC ralkap 20 leng an thi i hriam tampi an lak khawh tiah MNDAA thawngzamh The Kokang nih a thanh.
June 1 ah thazang 70 leng SAC ralkap pawl nih MNDAA Brigade 511 an rak doh hna i June 4 in June 5 tiang kahdohnak a chuak tiah theih a si.
June 4 kahdohnak ah SAC ralkap mawṭaw 1 a rawk i SAC ralkap 4 an thi, chun sml 1:00pm hrawng ah kahdohnak a chuak ṭhan i SAC lei 8 an thih caah SAC ralkap pawl hnu an kir ṭhan tiah theih a si.
June 5 ah kahdohnak a chuak ṭhan i SAC ralkap mawṭaw 1 an hrawh khawh ṭhan i ralkap 16 an thi, tampi nih hliam an tuar tiah theih a si.
Kahdohnak chung in an lak khawh mi hriam hna cu Machine Gun kuan 230, hriamngan 3, bomrap 1 telh in raltuknak lei thilri tampi an lak khawh tiah theih a si.
