Ks. Sing 100 In Thantlang Bogyoke Milem Tuahdingmi Tender Aho Hmanh Nih An Sok Rih Lo
Salai Elvis| 2018 April 19| Thantlang khuachung ah Bogyoke Milem le pangpar dum tuahnak caah Ks. Sing 300 in tender auhmi cu atu ni tiang a soktu aho hmanh an um rih lo tiah thawng kan theih.
Bogyoke milem ca lawng ah sing 100 hman ding le hi tuahnak hmun zong Hakha in Thantlang khualuh lainak hauka (cusu-bar-ih) chak ah an tuah lai tiah tuanvo ngeitu pakhat nih a chim.
“Bogyoke milem cu pangpar dum caah tiin ekah-5 kan rak chiah chungmi khualuh hauka chak deuh teah khin a um i khi hmun ah amah milem zong kan chiah ko lai. Pangpar dum caah vawlei cu kan ngei nain zeihmah kan tuah bal lo caah a si. Atutan sing 300 kan hman dingmi hi amah milem caah sing 100 lawng kan hman lai i a tangmi 200 cu a lam cawhnak le pangpar dum hmun hma tuahnak caah kan hman lai i pangpar dum ca taktak cu a dang tein hmaikum ah budget ngan deuh kan hal than lai.Hi milem tuah timh mi cu sing 100 man a san pe 6 hrawng a si lai. Teder in auh ci a si lo, a tu ni tiang a sok mi zong an um lo tik ah kan mah sipin nih kan tuah te ko lai. Hi kongah ramkulh cozah nawl peknak aa tel lo i kanmah duh tein kan halmi hna a si” tiah Thantlang Sipin Committee Chairman Pu Ram Khar nih TCP ah a chim.
Hi kong he pehtlai in Online chungah alar ngaimi cu Bogyoke milem nakin khua caah a thahnem deuhmi ti, mei le lam hna tuah deuh hna seh law a tha deuh lai tiah an chimmi kong hi a si.
“Mei cu kan herh ti lo 2018-2019 kum ah maha-dat line sing 5000 an kan pek ko, atu kum May thla dih hlan ah riantuan an dih cang lai. Ti kongah Vice President sinah kan hal cangmi a si, thla 11 budget chungah minute pakhat ah Gallon 300 tluk a chuakmi an kan pek fawn lai. Cucaah cun ti le mei cu hmuh cia ah kan i ruah. Khauchung lam luti hor zong 50 renglo kan tuah ko. Cun inn karlak lam zong Concrete lam in kan tuah, khua thanchonak kongah cun kan i zuam i kan i tuansek ve ko. Cucaah Bogyoke milem zong a herh thiam ve ko. Kawlram chungah Bogyoke milem tuahnak ding caah cozah nih buget a pek hna ti cu a um bal theng lo. Kanmah Thantlang lawng kan si lai, khua dang an tuahmi hna cu a lenglei sponsor in an tuahmi a si” tiah Pu Ram Khar nih a chim.
Thantlang khuachung Bogyoke milem tuahnak caah sipin nih April 7 in 20 tiang tender sonak ca a tar a mi chungah a tu ni tiang aho hmanh a soktu an um rih lo tiah theih a si.
