Kum 1 leng ah ralzaam sing nga le cheu an um tiah UNOCHA nih a thanh

0

The Chinland Post | 2022 April 19 – SAC ralkap nih hramhram in uknak a lak hnu kum khat leng ah inn le lo a zaamtak mi ralzaam sing nga le cheu an um cang tiah United Nation Office for the Coordination of Humanitarian (UN OCHA) nih April 19 ah a thanh.

Mipi inn, dawr le sianginn 8,000 leng a rawk i Sagaing ramṭhen, Magway ramṭhen le Chinram hna ah a tambik an si tiah UN OCHA nih a langhter.

Karen ram chungah SAC ralkap le Karen National Liberation Army (KNLA) karlak kahdohnak ruangah ralzaam 70,000 leng an um tiah KNU ramdang lei rianngeitu Pado Saw Taw Ni nih RFA ah a chim.

“Ralzaam hi an tam le tlawm caan a um. Pakhat chim khawh a simi cu SAC nih hramhram in uknak a lak hnu ah an tam chin. 70,000 nak tang an ṭum lai lo. Kahdohnak a chuah peng nak hi Kawkareik peng a hnulei le a hmailei he fonh in minung 30,000 hrawng an tlizaam lengmang. A zungzal cun an zaam lo, an zaam i an kir ṭhan”.

Ralzaam an tambik nak hi Sagaing ramṭhen ah 230,000 leng in a tambik an si. Kayah ram ah 90,000 in a pahnihnak a tambik an si.

Karen ram ahcun, 70,000 leng in pathumnak an si.

Myanmar ram Northwest lei ah a voikhatnak bik ralzaam 300,000 an phak hi a si tiah UN OCHA nih a langhter.

Myanmar ralzaam 34,500 cu India ram ah an zaam i Thai zongah 1,600 hrawng an zaam tiah a langhter.

A hlan tein a rak um cangmi ralzaam cazin he fonh ahcun ralzaam 900,000 leng an um cang tiah UN OCHA nih a langhter.

About The Author

Na ruahning rak langhter ve.. (Leave a comment)

%d bloggers like this: