Kum 18 A Tlingmi Lawng Nupi Pasal Ngei Kho Ding In Hluttaw Nih A Fehter
TCP-Hakha| 2019 March 14| Myanmar ram ah nu le pa i thitum khawhnak kumkhua cu kum 18 an tling hrimhrim lai. Kum 18 a tlingmi lawng nupi, pasal ngeih khawh ding in Amyotha hluttaw nih March 13 ah an fehter.
Ngakchia covo kongkau upadi ahran fehternak ding ah March 13 ah Amyotha hluttaw ah pakhat hnu pakhat in chekfel dih hnu ah vote thlaknak in an fehter hi a si.
Nu le pa hna i thitum khawhnak kumkhua cu tise-upadi hna le phunglam upadi hna i an kumkhua hoih in fehtermi he aa tlakmi ning in a si lai.
Sihmanhsehlaw, i thitumnak biahren (sachoh) tuah in i thit-um asilole biakamnak tuah in i thit-um a si ahcun kum 18 a tling cangmi lawng i thitum khawh a si lai tiah Amyotha hluttaw upadi ahran committee nih an chuahpimi cu a si.
A cheu atu bantuk kumkhua rikhiahnak an tuahmi cu an cohlan lo caah vote peknak in biakhiahnak an tuah hi a si. Hluttaw pahnih an ruahnak aa khah lo caah ramkomh hluttaw ah biakhiahnak an tuah than rih lai.
Ref: DVB Burmese
About The Author
