Kum 2 Leng Chung Ah SAC Ralkap Nih Nu 560 Hrawng An Thah Hna, 4,700 Leng An Tlaih Hna
The Chinland Post | 2023 July 4 — Myanmar ram ah hramhram in uknak lak a si hnu kum 2 le cheu leng caan chung ah SAC ralkap nih sualnak ngei lo minung 3,744 a thah cang hna i a tlaih/hren mi minung 23,670 tiang an um cang tiah Assistance Association for Political Prisoners (AAPP) nih a thanh.
Atu cazin hi 2021 February 1 in 2023 July 3 tiang AAPP nih a khawmhsuat mi a si i khawmhsuat khawh mi leng ah a thi mi an tampi rih lai tiah a langhter.
Pau Dothlennak chung, tuni tiang ah minung 19,312 an tlaih/hren cang hna i cu chung ah minung 6,645 cu thongthlak ding in biakhiah an si.
Dothlennak he pehtlai in an tlaih/hren hna i thah ding tiah biakhiah a tong mi 115 an um i hriawh in thah ding tiah biakkhiah a si mi 42 telh in minung 121 cu hriawh in thah ding tiah biakhiah an si caah thah ding tiah biakhiah a si mi an zapi te 157 an si cang.
Atutiang ah biakamnak he an thlah ṭhan cang mi hna 4,358 an um tiah a langhter.
AAPP nih a khawmhsuat mi cazin ning ah, a luancia June 1 in tuni tiang ah SAC ralkap nih Myanmar ramchung nu 559 an thah cang hna i Sagaing ramṭhen ah a tambik in nu 262 an thah cang hna. Cun SAC ralkap nih nu 4,724 an tlaih cang hna i Yangon ramṭhen ah a tambik in 1,220 an tlaih hna i cu chung ah nu 3,649 cu thong ah an hren lio hna a si tiah AAPP nih a langhter.
