Kum 30nak Chin Dohthlennak Ni Ah Ramchung Ramleng In Chin Miphun Minung 170 Leng An Chuak Kho
Salai Ngun San Aung| 2018 March 23| CNF/A nih dohthlennak an tuah a kum 30nak ni ah Chinmi ramchung ramleng in minung 170 leng nih Camp Victoria ah hlunghlai ngai in an zawh kho ti thawng kan theih.
A kum 30nk Chin Revolution Day tuahnak ding ca hin ramchung ramleng Chinmi hna nih chawva tampi an chuah i Sia pathum le vok lu hnih in puai zong sunglawi ngai in an tuah.
Pu Biak Ceu nih Sia pakhat (Malaysia), Pu Chum Ling nih Sia pakhat (Hakha), Pu Lian nih Sia pakhat (India), Rual-U nih 250,000 MMK (Thantlang), Dr. John nih 200,000 MMK (Hakha), Rual-U nih Vok pakhat (Yangon), Pi Kil nih Vok pakhat (Hakha), The Hakha Post-200,000 MMK le Rual-U nih 1,000,000 MMK (Hakha) an si hna ti tutan khualtlung le chawva bawmhchanhmi cazin ningin kan theih.
Chin Revolution Day tuahnak caah bawmchantu vialte cu CNF nih upatnak ROCA zong an pek hna. A cunglei ah kan langhter mi leng in ringawn lei ah seh thilri in siseh, hlasak siseh lam hmuhsaknak zong in telpi le thazaang petu an um lengah ringawn le hlasaknak caah a herhmi tangka bawmtu zong an um rih hna.
“Tutan ah kan ni sunglawi a kan sunlawi ter piak khun tu, hlasaknak le lam hmuhsaknak in a kan nuamhpi tu, cu vialte caah a dih heu mi a kan bawmtu an dihlak cungah upatnak le lunglawmhnak kan ngei. TnC Band in Thawng Bawi le a hawile, hla a kan sak piaktu-Mai Biak Tha Cuai, Mai Tawk Men, Mai Jolly Ngun le laam a kan hmuhsak tu Tlanglo mino le Matupi mino hna an dihlak cungah lunglawmhnak chim cawk lo kan ngei. Eidin a kan tlangtla tu Hakha in CYO le mino dangdang si hna seh, Thantlang lei mino an si ah an dihlak cungah kan i lawm taktak. Miphun caah a lamkip in rian a tuanmi kan hawile vialte, tutan ah a kan telpitu vialte cungah upatnak le lunglawmhnak kan ngei” tiah CNF lei nih an lunglawmhnak cu The Chinland Post ah an chim.+++
About The Author
