Kum 6 chungah Russia nih Kawl ralkap USD $ 247 million man hriam a zuarh

The Chinland Post | 2022 April 7 – SAC nih 2022 March 27 ah tuahmi Ralkap Ni ah SAC nih a tank pawl, missile a phortu mawṭaw pawl a langhter. Asinain, tutan cu kumdang bantuk in ramdang palai pawl an i tel lo.

2021 Ralkap Ni ah a rak kaimi Russia Deputy Minister of Defense Alexander Fomin cu kawh ṭhan a si ko nain a rak kai ti lo.

Myanmar ram ah 2021 February 1 thok in ralkap nih hramhram in uknak a lakmi cungah hnatlaknak a ngeihpimi ram tlawmpal chungah Russia zong aa tel ve. Cun, Russia nih a ram chuak hriam pawl zong Kawl ralkap a kuat ve. Cun, Russia nih Ukraine a tukmi cungah SAC ralkap nih hnathlakpinak a ngeih ve.

Australia ANU University, Southeast Asian he pehtlai in kherhhlai phu Hunter Marston nih Russia hriam cheukhat Myanmar ram phanhding ah timhtuahnak a ngei tiah a chim. Cheukhat hmunhma ah Helicopter remhding in Russia thiamsang pawl a herh hna tiah a phuan.

Russia cu Southeast Asia hriam cawknak caah a biapi bik a si i a luancia 2000 in 2019 tiang Asia chungah USD $ 10.7 billion man leng hriam a zuar tiah Stockholm International Peace Research Institute (SIPRI) nih a langhter.

Vietnam nih a tambik a cawk i 2000 thok in Vietnam hriam 80% hi Russia nih a zuarhmi a si. Cun, Myanmar ram zong hi 2015 in 2021 tiang USD $ 247 million man a zuarh. Laos ram hi USD $ 105 million man, Thai ram hi USD $ 47 million man a zuarh ve hna.

Ukraine ralpi a dih hmanh ah hriam cawknak le an pahnih karlak buainak cu a karh peng ko lai tiah Australia University saya pakhat nih a chim.

Cun, American le a hawikomh phu pawl nih Russia a ziizutding an i zuammi, Moscow nih Ukraine dirh ṭhanding in a hal a si ahcun ramkhel lei sining a buai chin lai tiah a chim.

Cun, ASEAN ram pawl le ram tampi nih an ngiat zir ko i buainak a karh chinnak hnga lo American le Europe ram pawl i bawmh a hau. Kawl ralkap a bawmmi Russia zong European Union (EU) nih a phihkhar lai tiah a chim.

2000 in 2021 tiang, Russia nih hriam a zuarmi Southeast Asia ram 5 chungah Vietnam hi a tambik a si i Malaysia, Indonesia, Thailand le Cambodia hna zong a tambik cazin chungah an i tel. Asinain, US nih India telh in Indonesia le Vietnam ram hna nih hriamnam an herh tikah Russia an i hngatchanmi kha ṭhumhter deuh a duh hna.

Southeast Asia hriamnam market ah Russia a biapit buknak a ruang hi a man a fawi leng ah a tha a ṭha i a si tiah Netherland ram ah hram a bunhmi DW thawngzamh nih a langhter.

A tu ahcun, Southeast Asia cu American le China an i zuamnak a laifang a hun si cang. Asinain, South China Sea chungah Vietnam, Philippine le China karlak ah rili ramri kong ah buainak a chuak kho men.

Ref: RFA

Na ruahning rak langhter ve.. (Leave a comment)

%d bloggers like this: