Kumkhat le Cheu Chung Ah Kahdohnak Voi 44 Kan Tuah I SAC Ralkap 91 An Thi : BPLA
The Chinland Post | 2023 July 3 — Barma People’s Liberation Army (BPLA) nih kumkhat le cheu caan chung ah kahdohnak voi 44 an tuah i SAC ralkap 91 an thi tiah June 30 ah cathanh an chuah.
2021 April 17 ah an rak dirh mi BPLA cu 2021 December thawk in ralram kahdohnak an tuah kho i KNLA nawlpeknak tang ah KNLA, PDF, Force for Federal Democracy (FFD) leng ah adang dothlennak phu pawl he kahdohnak a tuah mi phu pakhat an si.
Kahdohnak pawl chung ah SAC Infantry 97 pawl an i relh lo kar ah an kah hna i SAC ralkap 16 a nung in an tlaih khawh hna i 60MM pali, 40MM pahnih, RPG pahnih telh in hriam phun 68 an lak khawh tiah BPLA nih a langhter.
Kahdohnak pawl chung ah BPLA chungtel 4 an nunnak a liam, 16 hliam an tuar i damlonak ruang ah 3 an nunnak a liam. SAC ralkap nih 4 an tlaih hna tiah theih a si.
