Kumkhat leng caan chungah biaknak lei inn 130 leng hrawhpiak a si

The Chinland Post | 2022 July 1 – Mipi pawl chimnak le nuhrin covo phu pawl thanhmi cazin cung hngat in RFA nih a banh khawh tawk 2021 February 1 thok in 2022 June 27 tiang ah ralkap nih hramhram in uknak a lak hnu kumkhat leng caan chungah Sagaing, Magway, Chin le Kayah hna hna biaknak lei inn 132 khanghpiak le a phunphun in hrawhpiak a si tiah RFA nih a langhter.

Sagaing ramṭhen ah phungki sianginn 28, Nunnery (ti-lah-shin sianginn) 1, Mosque 2 le khrihfa biakinn 2 tiah a zapi te 33 hrawhpiak a si.

Magway ramṭhen ah phungki sianginn 11, khrifa biakinn 1 hrawhpiak a si.

Chin ramkulh ah khrihfa biakinn 66, Kayah ah khrihfa biakinn 20 le Muslim Mosque 1 khanghpiak a si tiah a langhter.

Sagaing ramṭhen, Pale peng hi SAC nih khanghpiak ruangah phungki sianginn a tambik a rawk.

SAC nih hramhram in uknak a lak hnu ah dai tein i pumh le Pathian biak khawh si ti loin nifatin nunnak caah tlik le zaam lengmang a si.

Chin ramkulh hi hramhram in uknak lak a si hnu ah khrihfa biakinn a tambik hrawhpiak a si.

Chin Affairs Federation nih ngeihmi 2022 June 27 tiang cazin ning ah hramhram in uknak lak a si hnu kumkhat leng caan chungah Chin ramkulh ning in biaknak lei inn 66 hrawhpiak a si. Khrihfa biakinn hrawhpiak a sinak hmunhma pawl hi Thantlang, Hakha, Tedim, Falam, Mindat, Kanpetlet le Matupi peng hna an si.

Chin ramkulh biakinn pawl hi an kan hrawhpiak hramhram mi a si tiah Chin Baptist Convention lutlai Rev. Dennis Ngun Thawng Mang nih RFA ah a chim.

“Biaknak inn pawl hi a thianghlim tukmi le upatnak sang bik kan pekmi hmunhma a si caah kan ngeihchiatnak a fak ngaingai. Cu bantuk inn pawl cu tinhmi ngei tein an kan hrawhpiak caah kan cohlang hrimhrim lo. Tuah sualnak le ti sualnak hi cu 100% chungah 5% lawng aa tel lai tiah ka hmuh. Tuah sual mi si loin tinhmi ngei tein an kan hrawhpiak tiah kan hmuh” tiah a chim.

Biakinn pakhat dirhnak ding caah caan le chawva tampi hman a si caah biakinn kan sunghmi hi a man a fak khun tiah a chim.

Biakinn pawl hrawhpiak a si lengah Pastor 20 hrawng tlaih an si i cu chungah 4 an thi, 12 cu thlah an si cang ko nain 4 cu a tutiang hren an si rih ko tiah Chin Affairs Federation nih March 22 ah a thanh.

Hramhram in uknak lak a si hnu ah hrawhpiak a simi biaknak inn 132 hi khanghpiak mi an tam. A cheu cu hriamngan nih a khen hna i a cheu cu ralkap pawl a chungah hmunhma khuar in hrawh hramhram mi zong an um tiah RFA nih a langhter.

Na ruahning rak langhter ve.. (Leave a comment)

%d bloggers like this: