Kyainseikgyi ah SAC battalion 3 an kah hna, SAC ralkap a za in an thi
The Chinland Post | 2023 January 5 – Karen ram, Kyainseikgyi peng ah a um mi SAC battalion 3 cu KNLA phufonh nih an kah hna i SAC ralkap 200 hrawng an thi tiah Kyainseikgyi mipi uknak phu nih thawng an thanh.
Kyainseikgyi ah a um mi SAC Infantry 32, Infantry 283 le Infantry 284 hna cu KNLA phufonh nih January 3 ah an kulh hna i January 4 ah an luh hnawh hna tiah theih a si.
SAC lei nih kahdohnak vanlawng le Helicopter in voi tampi kah an bawmh hna caah KNLA phufonh pawl har ngai in an lut, SAC ralkap 200 hrawng an thi kho tiah kahdohnak hmun ah a um mi Red Dragon hriamtlai pawl chim mi charhchan in Kyainseikgyi mipi uknak phu nih an langhter.
Mipi hriamtlai phufonh lei in CDM ralkap Ye Naing Twe telh in hriamtlai 4 an nunnak a liam tiah an langhter chih.
Kyainsekgyi ah a um mi SAC battalion 3 kah an ton ruang ah SAC ralkap a thi mi an tam ti mi thawngpang hi a dik lo tiah SAC nih January 4 zaanlei ah a thanh ve.
SAC lei in aa hliam mi an um i PDF le KNLA lei in a thi mi an tam tiah SAC lei cathanh ah hmuh khawh a si.
SAC battalion 2 cu mipi hriamtlai phu nih an lak khawh i a nung in an tlaih mi hna le a thi mi an tam tiah theih a si.
About The Author
