Kyainseikgyi Peng Palek Sakhaan, GAD Zung le Adang Zung Pawl Kahdohnak Ah SAC Ralkap 5 An Thi
The Chinland Post | 2023 July 18 — Karen ram, Kyainseikgyi peng ah a um mi SAC ralkap Khuhkhua sakhaan, Palek sakhaan, GAD zung, Me-sa-yin zung le bawmh ding in a ra mi SAC ralkap pawl an kah hna i 5 an thi tiah Special Operation Force (S.O.F) nih thawng an thanh.
July 11 thawk in July 16 tiang Kyainseikgyi peng palek sakhaan, Me-sa-yin zung hna leng ah SAC LIB 558 nih hmunhma an khuarnak Khuhkhua sakhaan le cu sakhaan ah bawmhnak pek ding in a ra mi SAC ralkap pawl cu Drone, hriamngan le meithal in an kah hna caah 5 an thi tiah theih a si.
Kahdohnak ruang ah Khuhkhua sakhaan telh in Kyainseikgyi khua palek sakhaan, GAD zung, Me-sa-yin zung hna a rawk dih i SAC lei nih vanlawng in bom an thlak, 120MM, 81MM, 60MM hna in hmunkip an kah tiah theih a si.
Kahdohnak chung ah KNLA, S.O.F, Cloud Wings Drone phu le Federal Wing Drone phu hna an i bawm tiah theih a si.
