Kyarinn Khuachung Lam Electric Mei A Ceu Cang
Kyarinn Khua Zan Meiceu/ Rev. Dr. Hnianguk
Salai Bawi Lian Sang| TCP-Kalay| October 2, 2020| Kalaymyo peng Kyarinn khua cu October 1 zan in Cozah Electric mei an ceu ve cang tiah theih a si.
“Kalaymyo peng Kyarinn khua ah October 1 zan in lam mei a ceu cang. Kyarinn khua chung lam kam keh le orh kip ah pe (110) dan ah meitung pakhat cio a um. Khuachung lei ah cun mei line pakhat cio in pe (110) dan ah mei tun pakhat cio an um” tiah Rev. Dr. Hniang Uk(Kyarinn Baptist Church) nih TCP ah a chim.
“Kyarinn mei vannak he pektlai in hlan ah Sita khualu lei um Kyarinn khua hnu lei um mi Tiva ah hy-dro Electric mei lak ding in sing 200 dih in kan rak tuah mi a um. Minung thazang, tangka thangzang deih lo le Cozoh mei a rat cang caah mah kan hydro Electric mei cu kan I din rih. A tu cozah mei cu innkhat ah kyat 360,000 kan pek hna. Lam mei cu a ceu cang ko I hmaithla lei ah cun innkip (meter box) mei a ceu cang ko lai. Lam mei van nak ah cun mizapi tangka liamter a si lo. Mah belte Htokcianh khua ah Sang (6) an um I mah chungah cun sang(3) komh in Group pakhat (1) camcawhfung an zuhter hna mah angahmi sang(3) komh group pakhat cu mei a pek chung hna. A dang sang (3)komh cu mei an hmu rih lo. Kan khua zong mah bantuk in sang then in camcawhfung an kan zuh ter kho men. Cun 2020 kum Kyarinn ah inn (550) hlei le milu 2500 le 3000 karlak lawng kan si lai. Khua bawi ah Pu Hniar Tum a si” tiah Dr. Hniang Uk nih a chim chih.
Kalaymyo peng 2020 kum hram thok in a voikhat nak lam area ah mei thlai ding tiah an ti.
Kalay Airport in nitlak lei Kalay-Tahan karlak lam mei tung kip ah Grace Light Lighting Solution, Supply Services nih tuanvo lak in mei tung bungh in mei a ceu dih cang. Chin miphun khua a si mi Kyarinn khua, Tayagone khua, Tuanchung khua vialte cu Kawlkhua HtokChianh Ohsuh chung ah chiah an si rih. Nihin Kalaymyo peng ah khuachung sang 20, Ohsuh 41 le Khuate 183 an um.
Aluancia mi 2015 kum thimnak ah Kalaymyo milu 379,132 le innchungkhar dihlak ah 76,773 ah methla kho mi 23,5231 an rak si. 2020 kum in thimfung (mee) a thla khomi dihlak 276, 882 an si lai.Mah chung in Chin miphun chungin me a thla kho dingmi 130,000 asi lai. 2015 thimkumnak in 2020 ah methla kho ding mi 41,651an karh deuh tiah TCP nih thawng kan theih.
