Kyaukhtu Peng, San Khua Pawng Ah Kahdohnak A Chuak I SAC Ralkap 2 An Thi
The Chinland Post | 2023 June 5 — Magway ramṭhen, Kyaukthu peng, San khuate pawng tlang cung ah kahdohnak a chuak i SAC ralkap 2 an thi, hriam cheukhat an lak khawh tiah YDF nih a thanh.
June 3 zaanlei sml 5:30pm hrawng ah SAC ralkap 180 hrawng nih San khua tlang hmunhma uk kho ding in hmunhma zohfelnak an tuah caah YDF he kahdohnak a chuak i SAC ralkap 2 an thi, 4 an i hliam tiah theih a si.
“June 4 ah Kyaukhtu khuachung lei ah an kir ṭhan, an rak kai kan hmuh hna caah kanmah lei nih kan kah hmasa hna. An kan kah ve i sml cheu hrawng kahdohnak a rau. An i tinhnak hmunhma lei ah kanmah kan um an theih caah an kir ṭhan” tiah YDF rianngeitu nih Khit Thit ah a chim.
Kahdohnak chung ah YDF nih a hruai hna i Yaw Naga phu, Gangaw pengkomh B09, Company 1, Kyaukhtu PDF hna bawm in kahdohnak an tuah hi a si i SAC ralkap kuanzen cheukhat zong an lak khawh tiah theih a si.
