Kyaw Htet Aung Cu Chinram Ah Salai Thang In Muicawl Aa Thla Lai

0

The Chinland Post| 2019 July 4| Korea-Myanmar pehtlaihnak caah “Minmei Cung Ah Pangpar” timi muicawl Chinram ah Korea lemcang thiam hna he Kyaw Htet Aung cu Salai Thang timi min in lemcang a tuah lai tiah Chin World he Interview tuahmi in kan theih.

Kyaw Htet Aung hi Myanmar Idol hlasak zuamnak ah caantlai a tuannak in le Myanmar ram TV le fakthanh muicawl ah mi tampi nih hmuh le theihmi a si pin ah mizapi uar a tong ngaingaimi a si.

Hi muicawl cu Academy Director Zin Yaw Mg Mg nih a thlak lai i lemcang thiam minthang a simi hna Wutt Hmone Shwe Yi, May Than Noe zong an i tel lai. Cun, Korea lemcang thiam fitlaw Ryu Sang Wooki le Korea lemcang thiam fidi pakhat he lemcang an tuahti lai.

Hi muicawl cu ks. sing 5000 dih in Chinram chung Falam, Hakha, Thantlang le Tedim ah an i thla lai. Cu hnu ah Korea ram Butan khuapi zong ah pehtlai in an i thla thiamthiam lai. Hi “Minmei Cung Ah Pangpar” timi muicawl ah Kyaw Htet Aung cu Salai Thang timi min in lemcang a tuah lai.

Chin World he ton biaruahnak ah Kyaw Htet Aung nih a tanglei in a chim.

Hi bantuk in Korea-Myanmar pehtlaihnak ca muicawl ah Chin miphun pakhat dirhmun in kaa tel khawh kaa nuam tuk. Hi muicawl ah keimah cu Chin miphun pakhat ngaktah sianginn in a thangmi dirhmun in lemcang ka tuah lai. A dikthliar cu muicawl a chuah tikah rak zoh cio te uh.

Chin ramkulh hi voikhat hmanh ka phan bal lo. Ka ngakchiat lio atu bantuk Internet a chuah lio ah upa hna sin in Minmei cung ah Laitlang cu a um tiah an chimmi ka theih. Chokhlei par sen tete a parmi, thinlung muisam a cuangmi tidil nganpi kong an chimmi ka philh kho lo. Cun, Chin miphun cu ramvai mi an si kong, mahnak upa deuh pawl an upat hna ning kong, Sia pawl an zuatnak kong le Chin nu pawl an hmai ah tatto an i suai tiah an chimmi ka theih.

Atu muicawl thlak ah a hmasa bik Chinram ka phak ding a si caah kaa ngaih tuk cang. Kan ram chungah kokek aa dawhmi pawl midang pawl hmuhsaknak ka ngeih lai caah kaa lunghmuih tuk. Cucaah, hi muicawl ruang ahhin Chinram aa dawhnak le a sining pawl ka hmuhsak khawh lai tiah a chim.

Ref: Chin World

About The Author

Na ruahning rak langhter ve.. (Leave a comment)

%d bloggers like this: