Kyunhla ah hngakchia telh in mipi 8 thah an tong
The Chinland Post | 2022 September 1 – Sagaing ramṭhen, Kyunhla peng ah SAC ralkap nih an thahmi kum 6 hngakchia telh in mi ruak 8 cu August 29 ah khuami hna nih an hmuh tiah Kyunhla PDF rianngeitu nih RFA ah a chim.
“Mipi pawl an tlaih hna lioah an kahthahmi hna an si. Van in kahdohnak lioah a khenmi zong an i tel. Kum 6 hngakchia te pakhat a tel timi zong a dik ko” tiah a chim.
Ruak 8 a si cu fehter khawh a si ko nain an ruak pawl hi a rawh cang caah mi zei an si timi bel cu fehter a har tiah a chim.
SAC ralkap pawl Ṭinpinseik khua ah August 25 ah an rak lut i August 28 ah an chuah ṭhan hnuin khuami hna nih ruak an hmuh hi a si.
SAC ralkap nih Ṭinpinseik khua ah hmunhma an khuar lio ni 4 chungah khua chungah a tapmi mipi an thahmi hna a um tiah Kanbalu PDF battalion 2 nih a rak thanh.
SAC ralkap an luh hnu thlakhat chungah Sagaing ramṭhen, Kanbalu, Kyunhla, Kawlin peng khuate 8 in mipi inn 300 leng an khangh i khuami 20,000 leng an zaam tiah a thanh.
About The Author
