Lah-wah-kah Zung Riantuan Minung 8 Eihmuar Ruangah An Tlaih Hna
TCP-Thantlang| 2019 June 13| Shan ramkulh Lashio khua Lah-wah-kah zung riantuantu minung 8 cu Hmat-pung-tin (NRC) tuahnak, Innchungkhar cazin chungah min khumhnak kongkau ruangah tangka an lak mi hna cu eihmuar ruangah an tlaih hna.
Lashio Lah-wah-kah zung lutlai Kyaw Kyaw Lin nih kum 18 a tling cang i hmat-pungtin tuahnak le innchungkhar cazin chungah ah min khumhpiak ding mi kongah sing (12) le 80,000 a lakmi hna kong, Daw Kyi Kyi Nyunt nih hmat-pungtin tuahnak caah sing 10 a hal mi hna kong, U Yan Win Aung nih hmat-pungtin a a thar in thlennak ding caah sing (15) a lak mi hna kong, U Htat Win Aung nih hmat-pungtin tuahnak ca le innchungkhar cazin tuahpiak nak ding caah sing 21 a lak mi hna kong, zungriantuan niamdeuh a si mi Daw Ma Sioh San nih hmat-pungtin 10 a bu in a tuahpiak mi hna cu sing (5) le innchungkhar cazin ah min khumhpiak man sing (6.8)a lak mi hna kong le Saw Eih Eih Mon nih innchungkhar cazin chung min khumhpiak nak caah sing 2, hmat-pungtin tuahnak le innchungkhar cazin a thar tuahnak caah sing (14) a lak mi hna kong le Daw Khin May Tun nih innchungkhar cazin chungah min remhnak le hmat-pungtin tuahnak caah sing (9) tiin an lak mi hna cu an nawl ngeihnak phungning lo in an hman pin ah le eihmuar dohnak upadi he aa kalh caah a tu bantuk in dantatnak tuah ding in kan tawlrel hna hi a si tiah Eihmuar dohtu phu (ACC)nih an langhter.
Mah pin ah an lu deuh a si mi Kyaw Thu Hein zong Kyaw Kyaw Lin nih kum 18 a tling cang i hmat-pungtin tuahnak le inn chungkhar cazin chungah ah min khumhpiak ding mi kongah sing (12) le 80,000 a lak mi hna kong le Daw Ma Sioh San nih hmat-pungtin 10 a bu in a tuahpiak mi hna cu sing (5) le innchungkhar cazin ah min khumhpiak man sing (6.8)a lak mi hna kong ah aa teltum ve caah mah hna pawl cu eihmuarnak upadi pohmah 56,63 ning in tazacuai le dandat ding in June 12 Lashio palek zungah an tawlrel lio hna a si a tiah kan theih.
Ref: ACC
About The Author
