Lai Cataar An Tlau

Salai Van Biak Thang — Mandalay in Lairam chung kan luh tikah khua min zapi cu Kawlca in tial an si. Khua luhnak le khua donghnak cataar hna cu Kawlca in tial an si. A cheu khua min cu a rel a har caah midang hal lo ahcun khoika khua kan phak hmanh theih a si lo.

Rangoon, Mandalay le Kawlholh hmannak khua dangdang i a thangmi mino hna caah cun a rel a fawi ngai men lai nain a kiken khuate lei le ramdang in Laitlang a rak tlawngmi hna caah cun a har ko lai. Kawlram ummi kan si caah Kawl cataar kan hmanmi kha a dik ve ko nain ziah Lai catial zong kan telh chih ve hnga lo ti ka ruat.

Khua chung kan luh tikah lamkam i khaimi kunza dawr in rawl-einak dinhhmun le thilthuam dawr tiang nih Kawl cataar lawngte kan hman ngawt. Dawr zongah ruah a si set lomi lamkam deuder bantuk ah datsi (petrol/diesel) a zuarmi zong nih cataar fatete caah Kawlca kan hman. Thil cawtu hi Kawlmi lawng an si tinak cu a si lai lo dah.

Hakha khua chung kan hon phan i Kawl cataar a tam chinchin. Cozah zung vialte cu Kawlca in tial dih an si. Lakphak dawr in sabuti dawr le Laithil zuarnak dawr tiangin Kawl cataar kan hman. Biakinn tampi nih Mirang cataar kan hman deuh i a cheu nih Mirang le Kawl kan cawh.

Lammin cu remhmi tete a um i rel khawh an vun si cang. Vunraang le miphun dang cu phun dang, Mizoram le Bangladesh i Chittagong Tlanghrawn um kan unau hna nih an kan tlawn tikah kan holh aa khat ko nain cataar an rel khawh ding a tlawm ngai lai.

Hi kong ruah tikah aho hlei mawhphurhter ding kan um lo. Thil sining nih a rak kan kalpi ngaimi a si i cu thil sining cu cozah he a rak i pehtlai peng. Nain, chan karlak ah kan sining kha kan rak i philh sual lo a biapi hringhran.

Atu kan sining ruah set tikah vawlei cungah miphun fate pakhat kan si. Hmailei kum 50, kum 100 hei tuak tikah Laica hi zeidah a lawh lai timi chim awkah a har ngai. Nain, cu lila cu kanmah miphun cungah ai hngetmi a si. Laitlang ah Lai cafang fonh in tialmi Lai catial le Lai cataar kan nunter a herh hringhran. #

Na ruahning rak langhter ve.. (Leave a comment)

%d bloggers like this: