Lai Villa Guest House Lak Kahdohnak Ah SAC Ralkap 7 An Thi, Hriam Zong An Lak Khawh
The Chinland Post | 2024 September 18 — Chin ramkulh, Thantlang khua um SAC ralkap pawl nih hmunhma an khuarnak Lai Villa Guest House sakhaan cu an lak khawh i SAC ralkap 7 hrawng an thi, hriam zong an lak khawh tiah CDF-Thantlang ṭuanvo ngeitu nih Khit Thit ah a chim.
September 17 zinglei sml 11:30am hrawng ah Thantlang khua um SAC ralkap 30 hrawng nih hmunhma an khuarnak Lai Villa Guest House cu Chinland Council kuttang hriamtlai phu pawl nih an kah hna i SAC ralkap 7 hrawng an thi, hliam a tuar mi adang ralkap tampi an zaam, an kaltak mi hriam pawl an lak khawh tiah theih a si.
“Thantlang khua ah SAC ralkap nih um hmun an khuar nak hmunli a um, cu chung ah Lai Villa hmunkhat cu September 17 zinglei sml 11:00am hrawng in kan doh hna, zaanlei sml 4:00pm hrawng ah tlamtling tein kan lak khawh. Hriam pawl zong kan lak khawh, SAC ralkap 7 hrawng an thi. Aa hliam mi zong an um. Atu Operation ah Chinland Council kuttang hriamtlai phu 15 hrawng kan i tel. Hriam tam nawn kan lak khawh, kuan, adang kahdohnak thilri pawl zong tam nawn kan lak khawh. Adang a tang mi sakhaan pawl zong kan doh cuahmah lio a si caah a rauh hlan ah teinak kan hmuh ko lai” tiah CDF-Thantlang ṭuanvo ngeitu pakhat nih Khit Thit ah a chim.
Kahdohnak chung ah CNA, CDF-Thantlang, CDF-Hakha le Chinland council kuttang hriamtlai phu pawl bawm in an kah hi a si i dothlennak phu lei an him tiah theih a si.
Thantlang khuachung ah a tang mi SAC ralkap nih hmunhma an khuarnak pawl cu Thantlang Myoma palek sakhaan, CB Bank le NLD zung hna an si i thazang 100 leng nih hmunhma an khuar i an kah cuahmah lio hna a si tiah theih a si.
About The Author
