Lailenpi Airport Cu Tukum Chungah Sak Hram An Thok Cang Lai
TCP-Online| 2018 February 24| Thlanglei Chin ramkulh Lailenpi khua Airport cu tukum chungah sak an thok cang lai ti kan theih.
Hi vanlawng tumnak (Airport) cu a ralaimi November in sak hram kan thok cang lai tiah Mission Aviation Fellowship (MAF) ah Kawlram lei Director simi Mr. Chet Tily nih February 23 ni Yangon khua Novotel Hotel i cozah he tonnak an tuah lio ah a chim. MAF cu Chin ram Lailenpi ah vanlawng tumnak hmun a tuahtu ding Company an si.
Mr. Chet Tily nih “Chin ram ah hin Airport a um maw um lo ti kan zoh hmasa. Tu Lailenpi i tuah kan timhnak a ruang cu, hi hmun hi kum khat ah thla 4-5 kar pehtlai in ruah a sur pengnak hmun a si. Cucaah, mah ka hmun i tuah ding in biachahnak kan tuah zong a si. Tuan hram cu tukum ni khua that caan September le November thla kar ah kan thok lai” tiah a chim.
Airport tuahnak ding kong ah Vawlei lei cu Kawlram hrambunh Han Myint Moe Company nih an zoh i valawng tual saknak ding Design cu India ram i Engineering Ministry International (Non-Profit Org) (EMI) le MAF nih tuah ti in ramkomh Transportation Ministry zung nih a a chimh ning in rian an tuan lai.
“Tutan Lailenpi i Airport sak kan timhmi cu vanlawng a nganmi tum khawhnak ding cu a si lo. Minung 10-13 kar aa tlummi vanlawng pawl lawng an tum kho te lai. Kan sak dih hin vanlawng lei tlaitu Director zung kan ap colh lai. Vanlawng a tum/zuan kong cu cozah sin nawl hal hmasat a hau lai. Kan nih lei nih cun vanlawng pathum tel cu tum kho kal kho peng ding cu kan duh” tiah Mr. Chet Tily nih cun a chim.
Lailenpi ah tuah timhmi Airport hi meter 800 tluk a kau lai i $ 2.2 Million dih ding in tuak a si. Rian tuan a lim dih hnuin ramkomh Ministry of Transportation kan ap colh te hna lai ti Mr. Chet Tily nih cun a chim chap.
Chinram ah Health and Hope Founder Dr. Sasa nih “kan ngakchiat lio ah Yangon van phak ding in hin zarh hnih kan rau tawn. Tu lam a hun that pah cang tikah 5 hrawng kan rau. Hi Airport hi aa lim khawh ahcun Lailenpi le Yangon cu minutes 90 lawng kan rau cang lai” tiah a chim.
Mah hihi kan Chin ram pehtlaihnak ca lawng si loin, a zaw dam lomi hna Yangon khuapi lei kal a duhmi ca zongah tampi thatnak a chuahpi te lai. Lailenpi ah hin fa hrin khawh lo ruangah hohmanh an nunnak liam ter chap ding ka duh ti lo. Chungtlik ruang ah nikhat ngakchia minung 3 an thi timi zong theih ka duh ti lo. Cucaah, mah Airport nih hin holh in kan chim khawh lomi kan ngaihchiatnak tampi a kan hnemh lai, tiah Dr. Sasa nih cun a chim chap.
Hiti a si tikah 2015 kum khan MAF he pehtlainak an rak tuah i vanlawng hmemi tumnak tel aa tuah khawh nakhnga cozah sin nawl an rak hal ti kan theih.
Myanmar National Airline i Director U Kyaw Soe nih “Chin ramkulh hi lam lei pehtlaihnak a that lo tuknak hmun pakhat a si. Lailenpi kal kan duh ah Magwe ramthen Gangaw in motor kan i cit. Cu zong cu khuasik caan le thal caan lawng ah kal khawh a si rih. Tlanglawng lam le a um lo. Ti lam zong a um lo. Hibantuk pehtlaihnak a that lonak ah hin vanlawng kan tumter ahcun khuami hna ca fimcawnnak, ngandamnak le chawlehnak ca tampi a bawmh hna lai. Cucaah, India he ramri a simi Lailenpi ah tubantuk Airport tuah timhmi hi kan ram a min kan thatter pinah khuami ca hunchonak ding zong tampi a bawmh hna lai” tiah a chim.
Lailenpi Airport cu 2017 July thla khan cozah nih tuahkhawhnak nawl a pek cang i 2020 April thla ah lim dih ding le May thla cun Airport hunnak zong tuah kho dingin timhlamhnak an ngei.
Ramkomh Ministry of Transporation kuttang ah hin vanlawng tumnak a fa le a ngan he tiin 69 a um. Mah 69 chungah Airport 33 lawng Kawlram chungah hman khawh an si.
Tutan Lailenpi Airport ah biatakte in bawmhnak le tuanvo kong hin MAF nih a lak. MAF cu mihrasa bawmhnak le khua pakhat hunchonak ding caah tiin vawleicung ah a nganbik Airline pakhat a si. Vawleicung ram 30 leng ah rian an tuan cuahmah i Kawlram ah hin cun 2014 kum in riantuan hram a thok ceomi an si. Kawlram cozah sin zongah MAF Myanmar Company tiah Register zong a tuahmi an si.
Ref:Irrawaddy
About The Author
