Lailenpi Khua Bomthlaknak Ruang Ah Mipi 4 An Thi, 3 An I Hliam
The Chinland Post | 2023 November 22 — Chin ramkulh, Matupi peng, Lailenpi khua ah ralkap nih vanlawng in bom a thlak ruang ah mipi 4 an thi, 3 an i hliam. Khuami 7,000 leng nih innlo an zaamtak tiah thawng theih a si.
November 19 zinglei sml 9:00am thawk in November 21 tiang ralkap nih vanlawng in bom a thlak hi a si tiah theih a si.
Lailenpi khua ah thazang 30 leng nih hmunhma an khuarnak ralkap sakhaan cu November 19 thawk in Chin hriamtlai phu pawl nih Drone in bom an thlak hna i ralkap lei zong nih an rak kah ve hna caah vanlawng nih kahdoh a bawmh hna hi a si.
Bomthlak ruang ah a thi mi hi kum 50, Pu Mecha le Pu Ngu Kha hna an si i adang 2 hi an ruak an la kho rih hna lo tiah theih a si.
Cun mipi 3 fak ngai in an i hliam caah himnak hmun ah an thlop hna tiah theih a si.
Lailenpi khuami tam deuh cu a pawngkam khua le India ramri hna ah an zaam i umnak le eidin lei bawmhnak an herh ko tiah theih a si.
Vanlei kahdohnak ruang ah sianginn, Biakinn telh in mipi inn 40 nak tlawm lo a rawk tiah theih a si fawn.
November 21 ah kahdohnak um lo pi in ralkap nih sml 11:50am ah vanlawng in bom a rak thlak chap tiah theih a si.
