Lailenpi vanlawng tumnak caah USD $ 234,000 tangka kawl a hau rih

0

Bringing Light to Myanmar tuah ni hmanthlak: Photo credit: MFA Myanmar

Salai Tluangkipthang| 2020 February 26–Lailenpi vanlawng tumnnak (Airstrip) tuahnak ah a tlawm bik US tangka in 234,000 (Kawl tangka in MMK 338,603,997) a duh rih tiah theih a si.

Hi kong he pethlai in, 2020 January 7 i Yangon Khualipi Park Royal ah tuahmi “Bringing Light to Myanmar” ah a kaimi pakhat nih hitin The Chinland Post ah a chim.

MFA upa nih Lailenpi Airstrip kong chimfiannak an ngeih lio; Photo credit: MFA Myanmar

“Anmah MAF riantuantu nih Lailenpi vanlawng tumnak kong ah fianternak an tuah. A tawlreltu le tangka kawltu hi Mission Avation Fellowship (MAF), Singapore in an sinak kong an langhter. England ram Siangpahrang te bawmhnak a si lo zia kha January 7 lawng ahkhan a fiang. Nain, MAF England nih cun a tampi an thawh. Cun, tangka an kawl cangmi kong le kawl chap a haumi a baumi zat zong an an kan chimh. Cucu, January 7 an chim ning ah, US$ 234,000 tluk a duh rih.”

Health & Hope Lutlai Dr. Sa SA tawlrelmi Lailenpi vanlawng tumnak an tuahmi ah tangka hi MAF International nih US $250,000 siseh, MAF UK nih $532,000 siseh, MAF Singapore nih $284,000 an kawlmi a si. An hmuhmi zapi hi $ 1,066,000 hi a si i, atu ah a bau rihmi cu US $ 234,000 a si tiah theih a si.

An timhtuahnak ning bantuk in a tlamtlin a si ahcun, Lailenpi vanlawng tumhnak (airstrip) hi May 2020 ah a dih lai tiah MFA Myanmar Facebook Page ah an langhter.

Lailenpi Airport tiah mizapi nih theih lengmang a si. Nain, Airport silo in, Airstrip, vanlawng tumnak a si i Airport he cun a dang deuh an ti. Cun, atu ahcun, saknak caah tangka a duhmi hi zeizah set dah a si cu ka hngal tilo. A ruang cu, Yangon ah tuahmi ni January 7 ah Dr. Anna Hluan, (Vice-president Henry Van Thio nupi) zong a tel kho i, anmah hruainak in tangka thawh biakamnak zong an tuah. A tam ngai a lut. Cun, Australia i ummi Laimi cheukhat zong nih an thawh tiah ka theih. Cucaah, tangka a duhmi hi a tlawm deuh cang lai” tiah January 7 Yangon Park Royal a telmi pakhat nih cun a chim chap.

Lailenpi in Vanlawng zuannak ding hmun: Photo credit: MFA Myanmar

Lailenpi Airstrip (vanlawng tumnak) a lim a si ahcun, Lailenpi in Falam hi mawtaw in kal ahcun, nihnih (2) a rau kho mi a si. Nain, vanlawng in minute 28 lawng a rau lai. Cun, Lailenpi in Kalay airport hi nili (4) a rau kho mi a si nain, minute 28 lawng a rau ve ding a si. Cun, Lailenpi in Mandalay hi minute 65 lawng a rau lai i, Lailenpi in Bagan hi minute 45 lawng a rau lai tiah theih a si.

Hi vanlawng tumnak nih a thathnempi dingmi hi tualchung ummi minung 4000 tluk a si lai i, a kiangkap he cun 40,000 caah thathnemnak a ngei lai tiah MFA riantuantu nih an Facebook Page ah an langhter.

Ref: MAF Singapore, MAF Myanmar (Facebook Page)

About The Author

Na ruahning rak langhter ve.. (Leave a comment)

%d bloggers like this: