Laimi Le Kumthar Zing Mileng; Salai Kep Chin Thang

0

Laimi kan thanchonak a kan dawn ngaitu cu sonhtarh kan hman hi a si tiah chim theo a si. Cucu a si ngai taktak! Kan rian kan tlamtlinh lo tik ah maw, asilole kan ngaih-lah, kan zenh deuh a si cun i sonhtarh ziar i, i phetchem kan hmang. Hihi Laimi kan kotho kalhmang hrimhrim a si ko rua.

Cucacun dah si lai, “ka fa thi kaw, sonh lo kai sonh” ti tiang in kan pupa nih phung an thluk hi. Sonhtarh kan hman ngaimi lak ah atu tiang in kan hman rihmi cu kumthar zing mileng min kongkau buai hi a si.

Kumthar zing kan inn ah a kan lengkai hmasat cemtu i a min a that si cun kum khat chung kan tluang. A min a chiat si le kan tluang lo tiah chim le phai a si. Kumthar zing ah ho dah a kan leng hmasat cem lai tiin bawh ziar kan hmang. Cucacun a cheu a min chiakha mi cu kumthar zing ah mi inn len ngam a si lo. Cucu nihin tiang kan thlau khawh rih lomi le kan i sonh ngaimi a si.

Cu nunzia cu khrihfa mit in zoh tik ah kan hman ding le kan i buaipi ding a si maw tihi a biapi ngai. Kumthar zing ah ho dah kan inn ah a rak kan leng hmasa cem hnga ti kha i hngahhlang cio a si. Nain kumthar zing ah ho dah kan inn ah a kan lengkai hmasat cemtu a si ti hi cathiang nih a kan chimhning in cun kan biakmi Pathian a si.

Job 7:17-18 ah “minung hi zeidah a si i hiti ko hin na ruah. Zingfa tein na veh i na hneksak lengmang?”

tiah kan hmuh.

Kan cathiang ning in zing arkhuan in kan inn ah a kan lengkai, vehvat hmasat cemtu cu kan Pathian a si. Zingkhat sawhsawh lawng a si lo. A zing fatin in a kan vehvattu kan mileng a si. Cu kan mileng cu zeizongza tuah khotu, thluachuah a ngeitu Pathian a si, Halelluijah!

Cucacun kumthar zing ah min sullam thalo a ngeimi nih an lenkai hmasat cem zong ah na tha chia hlah law, min sullam tha ngai a ngei nih an lenkai hmasat cem zong ah i lawm tuk duh hlah. Midang vialte hlan ah an lengkai hmasattu cu sertu kan Pathian a si ca tu ah khan i lawm ko.

Min sullam tha ngai a ngeimi nih a kan len cun lawm ngai in kan don i a kut kan tlaih bang kan Pathian nih zing fatin a kan lenkai caah hin lawm ko u sihlaw a nawl zulhnak hmang in a thluachuah don i tim ko hna usih. Kannih Laimi cu mileng nih an hun kan len tik ah kan mileng an siarem nakding aa zuammi le a dawmi kan si. Cucacun zing fatin in a kan lengtu kan mileng, Pathian kan pa siarem nakding kawl hi i zuam ve cang hna sih.

Cu kan mileng pa nih cun a kan fialmi phunglam zulh awk pakhat a um. Cucu sertu Pathian kha lungthin dihlak, ruahnak dihlak le thawnnak dihlak in dawt ding ah le pakhat le pakhat i dawt ding hi a si. Cucu Deut. 6:4, John 15:16 ah hmuh khawh a si. Kan Pathian kan dawt a langhnak cu kannih nih midang kan dawt hnanak nun nihhin a langhter. Midang va dawt khawhnak zong hi Pathian sin in a rami a si. Pathian dawt hmasat lawng ah midang cung ah dawtnak taktak langhter khawh a si. Cu kan nun hmang in midang zong nih Khrih zultu kan si kha an hngalh khawh lai.

Dawtnak cu a hmun zungzal dingmi thil pathum lak ah a ngan bikmi a si. Zeizong te kan ngeih, kan hngalh, kan thiammi an dong lai. Sihmanhsehlaw dawtnak cu a dong lai lo tiah cathiang ah kan hmuh. Cu dawtnak cu thlachiat a ruat i mi cungah zangfahnak a ngei, amah zawn lawng kha aa ruat lo, palhnak aa cinken peng lo, a hnahchuak fawn lo i, ziar a ngei lo, a ruam zong a kai lo i a lung a puam lo, a thin a tawi lo, dawtnak cu biatak ah ai lawm, a lung a dong bal lo. Zumhnak a ngei, ruahchannak a ngei i a lung a sau tiah, 1Korin 13:4-7 ah Paul nih a langhter.

Hi vialte hi dawtnak chung ah aa khumh dihmi an si. Hi dawtnak kan tuah khawh nakding ah cun kan lungthin kan ruahnak dihlak in kan Pathian kan dawt hmasat a herhmi a si. Cu ti kan tuah ko ahcun Pathian sin in a rami dawtnak phung kan ngei kho lai.

Kumthar zing ah kan inn a kan lengkai hmasat cemmi kan mileng Pathian kan Pa, kan chungkhar, kan khuatlang, kan miphun sin ah a siarem khawh nakding caah a kan fialmi dawtnak phung ngeih khawh hi tutan kumthar in cun kan rian lian bik si cang seh. Kan sin ah Dawtnak a um ahcun Pathian kan cung ah aa lawm lai. Pathian kan cung aa lawmh ahcun thluachuahnak cu a kan pek ko lai.

Cucacun kumthar zing kan mileng min kongkau ah i sonhtarh in kan lung buai len ti hlah seh. Kumthar zing ah a hung kan leng hmasat cemtu kan Pathian duh ning tu in kan nun hi dawtnak in thuamh cang hna usih. Pathian nih a kan fialmi dawtnak phung kan ngeih a si cun kan chungkhar, kan khuatlang le kan miphun ah remnak, daihnak a leng lai i kan tum lengmangmi vancung pennak cu kan chungkhar, kan khuatlang, kan miphun ah hin a leng ko lai.

Chin Digest: Vol.2, No.1(2016 February)

About The Author

Na ruahning rak langhter ve.. (Leave a comment)

%d bloggers like this: