Laimi Tui Liomi Le Tui Khawh Rih Lomi Ringawn Pawl

By Dio|2020 January|Music phun hi tthen a rem lomi an um nain aa tthen caah mah duh a si lo. Aa khat lomi miphun le nunphung kip in chan tampi chung hram a sihmi le aa khat lomi minung thinlung feeling in a rami an si caah a phunphun zong cu a si awk a si ko. Cu aa khat lomi hmuh thiam le cohlan thiam le anmah le an thawtnamning cio kha kathaw takin ei khawh tu khi a biapi ko rua.

Laimi zapi huap in ka hmuhningah vawleicung miphun kip nih an i hrawm khawh cangmi le an tui cangmi chungah kan tui khawhmi hi music phun hna cu Country Music, Rock Music le Lai Pop Ballads, R&B phun deuh an si hna. RAP music phun hi kan lut cuahmah lio. Kan hngakchiat deuh lioah kan pale tthi deng a simi kan ule cheukhat nih duhnung tukmi hla phundang tete zong an rak luhpi bal ko nain an dai tthan. Ka purhdahmi a ruang tampi a um nain ka tlangtar a si lo caah ka chim lai lo. Cu kan ule hla cheukhat cu Kawl hlabia zongin rak phanmi an um i Kawl pawl nih cun an i tuipi ngai hna i Kawl hla roling tiang ah an i chuah.

Science le technology a tthancho tuk tikah ringawn Instrument aw zong hi ttha chin lengmang in tuah an si i atu chan ahcun hla phun aa khat lomi zong kha aa tlakningin Instrument setup an cawh (Fusion) i cu pawl ko cu atu lio vawleicung i a lar cuahmahmi cu an si. Tahchunnakah chanhlun Reggae music phun kha chanthar thiamnak in Instrument aw phunphun in an vun ttamh Latin Instrument aw an vun chap ciammam i Reggaeton Music timi atu lio Justin Bieber te pawl an larnak hla thlum taktakmi phun hna a hung chuak. Cu lak laiah Traditional Reggae hmanh ah kan tui khawh rih lo cu kan tongh rih lomi pawl ahcun vawlei nih chan 2 in a kan lawnh ti khawh si.

Tthanchoternak le Technology lei i kan vai tel khawh lo hmanh ah mi tuah ciami le miphun kip nih a ttha aa dawh an ti cangmi tel ahkhin cun vai i paih deuh cu kan hau ko rua tiah ka ruah. Cangai bantuk in mah kua chung lawngah um peng i tuah bon peng tuah ahcun kaltak kan si sual lai.

Vawleicung Music phun cu tthangcho in tam lengluang ko hmanhseh law Traditional in a rak i thawkmi an hrampi deuh a si i zeitik chan tiluan hmanh ah an tharchuah khawh pengmi le vawlei cung music tiluan tawhfung an si tiah ka ruahmi phun ka banh khawh tawk tlawm tete cio in vun thai ta ka duh ko:

Jazz

Hi music hi hlanchan Classical Music in a rami a si i Jazz tiin a vun dir hi cu kum zabu 1 hrawng a si. Music Instrument an hmanmi hi Jazz timi muisam fiantertu bik cu an si. Saxophone, Piano, Trombone, Trumpet le Bass an tum dan le a hlavuak an chuihterning (Syncopation) hi phundang tuk a si. A chord zong hi Triads Chord sawhsawh in a ngah lo feeling a thuk tuk caah Extended Chord hrimhrim in tum a herh caah Jazz tum cu zenh cio a si. Chanhlun style deuh in tuahmi Jazz hla cu tarnu tarpa hna nih Ballroom ah an laamnak khun. Cozah uktu Diplomatic party te hna ah an hman khun i a fawinak chim ahcun High Class (mirum le mi sang) nih an uar taktakmi a si. Ram khat le ram khat i pehtlaihnak ah Jazz Music cu um lo theih lo Music phun a si. Chanthar style in tuahmi Jazz cu Funky ngai in tum an si i a beat zong a rang ngai ngai caah tlo taktak in Breakdance te pawl he laam khawh a si fawn. Thinlung taksa re a theih tuk caan ah lungthin dai tein le hnathiang tein um a duhmi nih Relaxation caah ngaih dingin an tummi cu chillout taktak in an tum tthan i vun ngaih ahhin mei alh i a alhmi thinlung hmanh khi tikik te toih bantuk in a khihter khawh. Mah caah Tourist tam deuhnak poh ahcun Hotel le Resort kip ah Chillout takmi Jazz music cu an chuah lengmang khi. Jazz a ngai pengmi hi an thinlung a dai deuh ko lai. Cucaah Biaknak lei le cawnpiaknak chim lo cun music lei kam in cun Jazz hi minung ziaza a tthatter bikmi le minung standard a cawisang taktakmi a si. Laimi zong kan tthangcho deuhdeuh lai i kan living standard a sang deuhdeuh lai i Jazz Music hi kan herh tuk te lai.

Funk

Funk hi tlonak le laamnak ahcun sapesial bak si. Funk music hi mirang nih an uarnak cu kum 60 hrawng a si cang i nihinni tiang zongah a lar bik peng a si rih ko. James Brown nih biatak tein a rak larter. Cucaah MMID i judge a rak ttuanmi Myanmar Pyi Teintan zong James Brown design rumro i a umnak khi a si men lai. Stevie Wonder, Michael Jackson, Justin Timberlake, Bruno Mars, The Weekend, Sam Smith tibantuk pawl hi Funk hla in a larmi an si. Atu chanthar mino tete nih sakmi mirang hla a lar bikmi pawl khi Funk deuh lawngte an si. Funky ngai in tummi Jazz hla zong khi Funk iangai deuh in an tum caan ahcun Funk lei deuh ah an chiah ko.

Funk Music tiah a fiantertu bik hi a bikin Bass le Drum tum dan hi an si. A beat khi Funky takin an kalpi i anmah nih a hla cu an mawngh. Bass le Drum a thiammi caah cun thiamnak a langhter khun hna. Slapping Bass te hna hi Funk a dawhtertu taktak a si. Guitar Strumming hrimhrim hi aa phundang. Guitar zong hi dawhtuk in tum khawh a si. Solo lead tibantuk belte cu a hau tuk ve lo. Guitar aw pi lawng ngaih ahcun sawhsawh a lo nain a hla zapi huap in cun a rak dawhter tuk.

Funk hi teamwork a um takmi music phun si tiin ka hmuh. Bass tum thiam Salai Za Lian te hna kha Funk Music rak tum hna hlah sehlaw an thiamnak an rak hmuh piak men hna lai lo. Funk beat kal dan hi Hiphop le Rap te hna he aa pehtlaih caah a kemhmi hlasa an tampi. A hla laifang zongah khin Rap he fonh khawh sak tti khawh a si. Lai hla cheu khat Kawl hla in kan i lakmi Funk phun nawn a simi zong an um nain mirang Funk he cun aa dang tuk. A music tum dan zongkhi Alternative Rock deuh in an tum caah Funk ti awk ttha loin Rock leikam deuh ah ka chiah hna. Funk hi Disco he cawhpalh a fawi ngai. A caan ahcun an Fusion tuk caah Funk kan ti lai ma Disco kan ti lai ti zong khi a har ngai. A fawinak in thleidan khawhnak ahcun Disco khi cu Software program deuh a si caah Guitar aw te pawl khi a phundang pipi in an thlenmi khin i fian khawh a si. Cun Disco laam dan le Breakdance laam dan khin tlaih khawh cu si. Disco cu down beat deuh si i Funk cu upbeat deuh a si.

Reggae

Reggae hi cu ka duh lawlaw. Mi a nuamhter tuk. A thlum tuk i a beat kal dan te nih khin minung thinlung a hlawh bak in a hlawh ko. Reggae hla ttha taktakmi a ngai i milem chim lo a pum aa hnger lomi an um lai ka zum lo. Traditional Reggae style te zongin zeitik chan hmanh ah a duai kho phun a si lo. Instrument set up zong a hleihluat pi a um lo nain amah Reggae color te a um ve. Electric Guitar a rak pawt ka aw bantuk hna khi a hau. Drum aw hna khi umkeng pakan dara an thlak sual tinak dingin a um. Drum le Bass hrimhrim passing an vun i pek ahcun bia dih. Tum thiam lo le sak thiam lo belte ahcun i chuihpah dihnak in a um. Tilio thiam loin Tio tiva lioh timh hna lawh a fawi. Thiam satsat loin mipi hmai i Reggae hla sak ahcun i chuahsual i timming zong out dih i mualpho a fawite. Reggae aa cit thiammi caah cun Secretariat rangtum cit nakin a nuam deuh. ? (Aa cit balmi ka lawhning). Reggae hi kan U/Pa a simi Saya Jonny Tial Awi nih a rak tuah ngai. Chanthar Lai mino Paling, Jh Thang tibantuk nih an vun chuahpi tthan i thazaang a tlung ngai. Kan Lai ringawn chungah leng ve cang seh ti ka duh ko.

Blues

Hi hla phun hi American bakin aa semmi si i kum zabu 1 leng a tar cang nain nihin ni tiang a lar peng rihmi a si. City ngan pipi nakin Rural area deuh ah a lar. Blues hi Jazz he unau bantuk in ruah an si. A ruang hi ka thei ve lo. Keimah caah cun aa ralkah nain a kal tti pengmi music tiin ka hmuh hna. Blues cu amah scale te bak a um ko i Jazz he a ni pehtlaihnak hi an beat deuh in a si caah hin unau phun in an chim peng hna zong hi a si ko lai ka thei ve lo. Blues hla hi hla thlum phun cu a si lo nain hla cian phun zong a si fawn lo. Thinlung feeling tu khi pin taktak in phuannak power a ngei i a biafang zong khi hmual an ngei khun. I ngaihchih tuknak, i duhsak piak tuknak phun expression caah cun special bak si. Chanthar R&B zong khi Blues in a rami si i nungak tlangval kar i duhtuk ruang i a chuakmi lungfahnak, thinlung temtuarnak tibantuk pawl phuannak caah a feeling um taktak. Blues hi Music a uar tuk lomi nih cun an ngai huam tuk lo tthal kawpi bantuk a si caah a lar phun cu a si lo nain a thi kho phun zong a si ve lo. Music tum thiam pawl nih an hriamnam a ni tatnak bak a si ve caah mipi nih an uar lo zongah Musician nih cun an uar peng ko lai.

Rap/Hiphop/R&B

Hi hla phun pawl hi chanthar Lai mino nih an luhpi cuahmah lio. Nung hram hna seh. A cunglei music phun 4 nih an hrin mi an si ti ahcun a palhnak um tuk lai lo. Hiphop hi a thlum al positive mood deuh in ka feel caah keimah pumpak nih cun ka uar. Tthangthar mino deuh nih uar an si tikah a caan ahcun sualnak leiah kalpi sual an fawi caah i ralrin ngai a haumi music phun an si. Music mit in zoh lam ahcun a music an tum dan le a hla kal dan cu a mak lawlaw khi si ko.

Music dangdang cu a cunglei music pawl nih hrimmi lawngte an si ko cang i thuk deuh theih duh ahcun mah te cio in i purhdah si ko cang seh..

Ka lawm,

Dio