Laitlang Mincimh Tilianh Ruang Ah Minung 4 An Thi I Inn 23 Leng Nih An Inn An Zaamtak
City Hunter| 2018 June 14| Atu lio cat lo in a surmi ruah ruang ah Laitlang ah lam rawh, mincimh, vawlei tolhnak a chuak i July 13 tiang ahkhan Hakha, Falam, Mindat, Paletwa le Matupi peng in minung pathum an thi i inn 22 leng nih an inn an zaamtak manh cang. Laitlang khuakip pehtlaihnak lam zong tampi a cim, a cheu cu a lam ning in a tlaumi zong an um tiah kan theih.
Chin ramkulh thlanglei Kanpetlet peng, Tikung khua ah sianngakchia 6 le hringtu nu pakhat, an zapi minung 7 cu June 7 zanlei sang ah ti nih a fenh hna. Ti nih a fenh hna hi zanlei sianginn chuah caan suimilam 3:30 hrawng ah a si. Tiva ti a lianh tuk caah hringtu nu pakhat nih ngakchia hna cu tiva tiang a va don hna. Cuti a va don hna nakah hringtu nu tel in siangngakchia 6 cu ti nih a fenh hna. Hi tiva cu Chauhchawng a si i hlei a um lo.
Ti nih a fenhmi 7 lakah ngakchia pathum cu ti nih a fenh hna tlawmpal ah a nung in an hmuh, chanh khawh cang hna. June 8 zingka ah ti nih a fenhmi ngakchia pakhat cu tiva ah a ruak in an char. Atu tiang hi hringtu nu pakhat le siangngakchia pahnih cu an hmu kho rih hna lo.
“Cat lo in a surmi ruah le mimcimh ruang ah lam an rawh lawng si lo in inn tiang a kak, tihnung dirhmun tiang a phan. Atu hi Matupi khuapi chung vawlei a tolhmi le inn a cimmi ruang ah innchungkhar 10 nih an inn an zaamtak cang. An inn hi um ngam ding a si ti lo ca le tihnung tuk an si cang caah atu bantuk in an chuahtaknak cu a si. Innchungkhar 10 cu anmah he aa naihniammi chungkhat rualchan sin ah an i dor. Cu lawng si lo in Matupi khuapi chung lam a cimmi le cheukhat lam cu a tlau bak in a tlaumi zong an um” tiah Matupi khua in Ngala sang khuabawi Ko Salawng nih a chim.
“Atu lio cat lo in ruah a sur ruang ah Kaladan tiva ti a lian. Cu ruang ah Kaladan tiva kam ah a ummi Paletwa khuapi chung in inn 10 renglo nih an inn an zaamtak manh cang. Khuapi chung hmunhimnak ah an i dor chung. Pehtlai in ruah a sur rih ahcun Paletwa khuapi chung Nah-tah-lah sianginn zong thinphang taktak a si” tiah Paletwa khua in zatlang bu mino Ko Kyaw Aung nih a chim.
June 12 ah Hakhathar inn pahnih zong catlo in ruah a surmi ruang ah inn pakhat cu a kak, a dang inn pakhat cu a sawn. Tihnung le thinphang ngaingai an si. Hniarlawn lam zong a cim, electric tung pathum hrawng an pur. Hakhathar sang chung lam cheukhat zong vawlei a cim, a kak mi tete an um. June 12 ah Matupi peng, Lailenpi khua inn pakhat zong min nih a cimh hnawh caah innngeitu chungkhar nih an chuahtak. Matupi le Rezua kar pehtlaihnak zong min a cim i a pit dih. Cycle zong a cawi bak in an cawi. Khualtlawng tlungkalmi harnak tampi an tong tiah kan theih.
Mindat khuapi chung lam pakhat zong a cim i a tlau dih. Mindat pengkomh pawngkam ral i vennak zung an sak liomi retaining wall zong a cim. Falam khuachung Valai veng Pu Rung Thang inn hmai lungrual mi zong June 11 ah a cim. Vawlei a cimmi nih inn zong a hnorsuan caah inn ngeitu chungkhar nih an inn an zaamtak.
Thantlang peng, Tikir le Vanvakua karlak lam zong a min. Lam hi a tlau bak in a tlau. Hripi lam zong min a cim i minung, cycle le motor kal awk tha lo in a phih dih. Hakha peng chung Senthang peng, Zokhua peng, Mie peng khuate lam pawl zong vawlei a cimh ruang ah khuami tlungkalnak tampi harnak an tong. Kalay-Taingen kar zong ah lam a pit pah lengmang. Tedim le Rihkhawdar kar pehtlaihnak lam zong vawlei a minh pah caah khualtlawngmi harnak tampi an tong tiah kan theih.
Photo Credit: Seeker Cinzah, Boia David, Vakok Voice
About The Author
