Lam A Zawhmi Hakha Lothlo Bu Nih Inn Ngei Lomi Papek In Hmun Pek Ding An Hal

Hakha lamzawhnak (Photo: TCP)

Salai Elvis| 2019 January 27| Chin ramkulh cozah nih tawlrelmi Hakha khua chung sersiamnak le inn hmun cawhmi kongah pupa ram ngeitu hna le hmunhma ngeitu hna chimhruah ta lo in rian an kan tuan hnawh tiin lam an zawhnak ah Hakha Lothlo Bu hna nih innhmun samh le pek tikah sifak mirum thleidang lo tlukrual te le inn ngei lo bakmi kha papek in innhmun pek ding halnak an tuahchih.

Mah ni ah Lothlo bu hna nih Chin ramkulh cozah sin ah thil an halmi cheukhat cu; Mirang uknak chan lio in rak pek cang mi pupa ram vawlei ngeitu hna cu anmah vawlei si thai dingin tawlrelpiak ding, 1984 kum vawlei hmunhma kong upadi ning, remh lio mi upadi le a hnubik 2018 kum vawlei hmunhma kongkau upadi ningin tawlrelpiak ding. ‘Innn hmun samh ding mi chungah mirum le inn tha a sa khomi lawng hmunrem pek hna ding’ tiah Hluttaw Speaker Pu Zo Bawi nih a chimmi cu upadi he aa kalh pin ah sifak mirum thleidannak le sifak mi hna zeirel lo le thlanglamhnak bia a si caah fakpi in kan doh. Inn hmun pek ding kongah cozah riansang tlaimi hna le mi sawhsawh tiin rikhiah a um lo nakhnga aa ruang tein mee zuhter dih ding le a bik in Hakha khua ah inn ngei lo bak mi lawng papek in inn hmun pek hna ding kong hi an si.

Hakha lamzawhnak (Photo: TCP)

Kum 30-40 chung kan pupa ram chungah kan cinmi thilnung hna cu Chin ramkulh cozah nawl ngeitu hna nih vawlei hmun ngeitu kanmah theihternak le chimhruah ta lo in an cawh caah a tu bantuk in kan lungtlin lonak lam kan zawh hi a si” tiah tawlreltu Pu Hrang Kep nih a chim.

Duhlonak lam a zawhmi hna chungah Chin ramkulh cozah nih tawlrelmi Hakha khua siamremhnak le innhmun samhmi ekah 676 chung ah lothlo bu chung in ngeihmi vawlei hmun, pupa ram ngeimi vawlei hmun le a dangdang vawlei hmun a ngeitu minung 300 leng nih January 25, zinglei suimilam 11:00 in 12:50 tiang Thantlang lamton in Vomtumaung cerhtual tiang duh lonak lam a zawh hi a si.

Lamzawh tawlreltu le hruaitu hna nih Hakha khuapi innhmun samh le khuapi thanchonak ding riantuan hi kan duh tukmi le tha kan pek tuk vemi an si. Sihmanhsehlaw, cozah nih ningcangte in a tawlrel lo ruang ah atu bantuk in cozah riantuanning le vawlei hmun a tonghthamning duhlonak lam kan zawh hi a si tiah media sin ah an chim.

Hakha lamzawhnak (Photo: TCP)

Mah lam zawhnak ni ah catar an i kenmi le an aumi bia cu; Upadi tangin riantuan ding, Tlangcung mi lothlotu hna covo runven ding, Lothlotu hna nunnak cawisanpiak ding, Chin ramkulh cozah nih rampi nih a ser mi vawlei hmun upadi phunglam tling tein zulh ding, Phungning lo vawlei chuh mi pawl vawlei hmun ngeitu hna sin ah rianrang in ap than ding, Pupa ro vawlei hmun hna le lothlo tu hna zapi ngeih mi vawlei runven ding, Chin ramkulh chung ziknawh eihmuar hmangmi riantuan tu paoh dohkalh ding, Chin ramkulh chung vawlei hmun buainak tawlrel tikah Chin nunphung upat le hmaizah ding, Langhngannak (punh-lin-min-ta-hmuh) a um lo mi Town Plan kan herh lo, Rampi ruahnak petu hmai ah kan tawlrel lai ti riangmang i a hnu ah tawlrel piak lo’ timi hna hi an si.

“Hakha cu Chin khualipi a si caah le inn ngei lo inn hlang an tam caah ekah 676 inn hmun thar samh kan timhnak hi a si. Hmun kan samh timhnak cu Cawbuk le CCU pawnghrawng khi a si. Zeitindah inn hmun pek le samh a si lai timi cu biakhiahnak kan tuah rih lo. Inn hmun hi a lak in pek a si lai lo, a tlawmbik ks. Sing 5, sing 10 paoh cu lak an si te lai. Inn hmun a that deuhnak cheukhat cu ks. Sing 20 in ks. Sing 50 tiang zong a phan te kho men” tiah Chin ramkulh cozah phu chimnak nawl ngei mi Minister Soe Htet nih TCP ah a rak chim.

2018 kum ahkhan Chinram cozah nih ekah 100 tluk innhmun an rak samh bal cang. Hi innhmun an samhmi zong cu tlamtlingte in cozah nih an tawlrelpiak khawh rih hna hlan ah atu bantuk in innhmun ekah 676 renglo innhmun samh chap an timh than tiah theih a si.

Na ruahning rak langhter ve.. (Leave a comment)

%d bloggers like this: