Lashio Peng Ah TNLA le SAC Ralkap Karlak Ah Ni 2 Chung Kahdohnak A Chuak
The Chinland Post | 2023 August 11 — Shsn ram chaklei, Lashio peng ah TNLA le SAC ralkap karlak ah ni 2 chung pehzulh in kahdohnak a chuak tiah TNLA nih thawng an thanh.
August 10 ah TNLA Brigade 6 hmunhma, Lashio peng, Nanlawng khua pawng ah PSLF/TNLA sakhaan cu SAC nih Helicopter in a kah hnu ah kahdohnak a chuah hi a si.
Chun sml 2 hrawng ah kahdohnak Helicopter nih a rak kah i sml cheu a rauh hnu ah SAC ralkap le TNLA hna karlak ah kahdohnak a chuak i sml 4 hrawng a rau.
SAC Infantry 16, Infantry 68 le TNLA karlak ah kahdohnak a chuah hi a si i SAC lei a thi mi an um ko tiah an langhter.
Sihmanhsehlaw SAC ralkap a thi mi cazin a fiang in kan thei rih lo tiah TNLA nih an thanh.
SAC ralkap le TNLA ralkap cu August 9 zong ah chun sml 1:30pm in zaanlei sml 5:00pm tiang kahdohnak a fak tiah theihternak an tuah.
Cun SAC ralkap nih thazang a chap chin thluahmah tiah TNLA nih a thanh fawn.
TNLA le SAC ralkap cu July thla chung zong ah kahdohnak a fak i July 23 tiang ah kahdohnak voi 11 a chuak i SAC chungtel 25 nak tlawm lo an thi i hliam a tuar mi zong an tam tiah TNLA nih a rak thanh.
